Girmek
«Arkadag» topary «AFK-nyň Çempionlar ligasy — 2» bäsleşiginiň toparlaýyn tapgyrynyň jemleýji duşuşygynda Bahreýniň «Al-Haldiýa» toparyny 1:0 hasabynda ýeňip, toparda ikinji orny eýeledi we turniriň pley-off tapgyryna ýollanma gazandy.
Duşuşyk «Arkadag» stadionynda geçirildi. Oýundaky ýeke-täk goly 45-nji minutda Ýazgylyç Gurbanow derwezä girizdi.
«B» toparçanyň beýleki duşuşygynda Özbegistanyň «Andijan» topary Kataryň «Al-Ahli» toparyndan 0:2 hasabynda utuldy.
Toparlaýyn tapgyryň netijeleri boýunça birinji orny «Al-Ahli» (10 utuk), ikinji orny bolsa «Arkadag» (7 utuk) eýeledi. «Al-Haldiýa» 6 utuk bilen üçünji, «Andijan» bolsa 5 utuk bilen dördünji ýerde galdy.
2023-nji ýylda düýbi tutulan «Arkadag» topary öz taryhynda ilkinji gezek Aziýanyň ikinji derejeli klub turniriniň pley-off tapgyryna çykmagy başardy.