Türkmenistanyň paýtagtynda Täze ýyl baýramçylygyna işjeň taýýarlyk işleri başlandy. Baş arça «Älem» medeni-dynç alyş merkeziniň öňündäki meýdançada oturdyldy. Şol ýerde Aýaz babanyň gatnaşmagynda Baş arçanyň çyralarynyň ýakylmagy mynasybetli dabaraly çäre geçirildi.

Aşgabadyň köçeleri we seýilgähleri dürli öwüşginli yşyklar bilen bezeldi. Esasan-da, jemgyýetçilik ýerleri aýratyn bezegli görnüşe eýe boldy. Ýaşaýyş ýak toplumlarynda, şol sanda «Parahat — 7» ýaşaýyş toplumynda hem jaýlaryň penjirelerinde Täze ýyl arçalarynyň yşyklary lowurdap dur.

«Altyn asyr» Gündogar bazarynda, «Gülüstan» bazarynda hem-de beýleki söwda nokatlarynda dürli ölçegdäki we görnüşdäki emeli arçalaryň, şeýle-de arça bezegleriniň giň görnüşleri hödürlenýär. Olaryň arasynda üstüni gar basan ýaly täsir döredýän we içki yşyklandyryşly görnüşler aýratyn meşhurlykdan peýdalanýar.

«Berkarar», «Gül zemin», «Arkaç» söwda merkezlerinde, şeýle-de «Parahat — 7» ýaşaýyş toplumyndaky «Bereketli» bazarly söwda merkezinde baýramçylygyň öňüsyrasynda arzanladyşlar guraldy. Dükanlarda ýerli öndürijileriň azyk önümleriniň giň görnüşleri bar: konditer önümleri, et önümleri, ter gök-bakja önümleri we miweler. «Hasar» konditer kärhanasy baýramçylyk mynasybetli «Aýyjyk» we marmeladly «Panda» atly täze şokoladly süýjüliklerini çykardy. Çagalar üçin taýýar sowgatlyk toplumlary aýratyn uly islegden peýdalanýar.

Paýtagtyň merkezi meýdançalarynda ýetip gelýän Täze ýyly alamatlandyrýan «2026» sany ýazylan yşyklandyrylan kompozisiýalar ýerleşdirildi.