Türkmenistanyň Goranmak ministrligi 2026‑2027 okuw ýyly üçin Beýik Saparmyrat Türkmenbaşy adyndaky Harby instituta hem-de ýöriteleşdirilen harby okuw mekdeplerine kabul edişligiň başlanandygyny yglan etdi.

Harby instituta kabul edişlik

Beýik Saparmyrat Türkmenbaşy adyndaky Harby instituta orta bilimi bolan Türkmenistanyň raýatlary giriş synaglarynyň netijeleri boýunça bäsleşik esasynda kabul edilýär. Okuwyň möhleti 5 ýyl.

Bäsleşige gatnaşmaga 24 ýaşyna çenli çagyryş boýunça harby gullukdan geçen ýa-da meýletin gulluga girmäge isleg bildirýän erkek raýatlar kabul edilýär. Şeýle hem Goranmak ministrliginiň ýöriteleşdirilen harby okuw mekdepleriniň 25 ýaşyna çenli bolan uçurymlary hem-de şertnama esasynda gulluk edýän 24 ýaşyna çenli harby gullukçylar kabul edilmäge hukuklydyr.

Dalaşgärler 2026-njy ýylyň 1-nji maýyna çenli ýaşaýan ýerindäki ýerli harby wekillige arza tabşyrmalydyrlar. Giriş synaglary matematika, fizika, Türkmenistanyň taryhy dersleri boýunça geçirilýär, şeýle hem beden taýýarlygy boýunça goşmaça şertler göz öňünde tutulýar. Synaglaryň hemmesi türkmen dilinde geçirilýär.

Okuwa kabul edilen harby talyplar umumy ýaşaýyş jaýy, harby lybas we okuw gollanmalary bilen üpjün edilýär, şeýle hem Türkmenistanyň kanunçylygyna laýyklykda bellenilen tertipde we möçberde talyp hakyny alýarlar.

Ýöriteleşdirilen harby okuw mekdeplerine kabul edişlik

Goranmak ministrliginiň ýöriteleşdirilen harby okuw mekdeplerine 2026-njy ýylda orta mekdepleriň 8-nji synpyny tamamlan, 14‑15 ýaşly oglanlar kabul edilýär. Okuwyň möhleti 4 ýyl.

Arzalar 2026-njy ýylyň 1-nji maýyna çenli ýerli harby wekillikleriniň üsti bilen kabul edilýär. Dalaşgärler orta mekdebiň 8-nji synpynyň okuw maksatnamasyna laýyklykda derslerden synag tabşyrýarlar, şeýle hem türkmen dilinden diktant ýazýarlar. Giriş synaglary türkmen dilinde geçirilýär.

Harby okuw mekdepleriniň okuwçylary umumy ýaşaýyş jaýy, harby lybas we okuw serişdeleri bilen üpjün edilýär. Olar günde dört gezek naharlanýarlar. Okuw maksatnamasy okuw sapaklaryny, harby-terbiýeçilik çärelerini, okuwdan daşary işleri, nobatçylyk gullugyny, beden taýýarlygyny we çuňlaşdyrylan başlangyç harby taýýarlygy öz içine alýar.

Kabul etmegiň şertleri we gerekli resminamalar barada giňişleýin maglumat ýaşaýan ýeriňizdäki ýerli harby wekillikde berilýär.

Kabul etmegiň doly tertibi bilen 2025-nji ýylyň 16-njy dekabrynda çap edilen «Türkmenistan» gazetinde tanşyp bilersiňiz.