Türkmen web-studiýasy Zer Design (HK «Zer Dizaýn») Archalyk.com taslamasy bilen dünýäniň iň abraýly halkara baýraklarynyň biri bolan Awwwards baýragynyň «Site of the Day» derejesi boýunça abraýly baýragyň dalaşgärleriniň hataryna girdi. Bu baýrak her ýyl dünýäniň dürli künjeginden iň gowy web-taslamalaryna berilýär, we baýraga hödürlenmegiň özi sahypanyň ýokary derejeli dizaýnynyň, innowasion özboluşlylygynyň we ýerine ýetiriliş hiliniň ykrar edilmegidir.

Archalyk.com taslamasy şol bir at bilen tanalýan türkmen brendiniň sargyt etmegi boýunça işlenip düzüldi we häzirki zaman görnüş stili, uýgunlaşdyrylan interfeýsi hem-de amatly nawigasiýasy üçin oňyn seslenmelere eýe boldy. Bilermenleriň pikiriçe, saýt brendiň sanly giňişlikdäki ornuny netijeli güýçlendirýär we onuň önümleriniň eksport bazarlarynda öňe gitmegine ýardam berýär.

Awwwards saýtlary dizaýn, ulanyş amatlylygy, döredijilik hem-de tehnologik mümkinçilikleri ýaly ölçegler boýunça bahalandyrýar. Emin agzalarynyň düzümine sanly dizaýn dünýäde atlary ykrar edilen hünärmenler girýär. Eger Zer Design taslamasy «Site of the Day» derejesinde ýeňiji bolan halatynda, ol indiki tapgyrlara — «Site of the Month» we «Site of the Year» bäsleşiklerine gatnaşmaga hukuk gazanar.

Zer Design — Türkmenistanyň öňdebaryjy sanly studiýalarynyň biridir. Onuň hyzmatlary web-saýtlaryň, brendingiň, animasiýanyň, grafiki dizaýnyň we sanly marketingiň işlenip taýýarlanylmagyny öz içine alýar. Toparyň bukjasynda dürli işewürlik ugurlary üçin amala aşyrylan taslamalaryň uly sany bar.

Zer Design topary sanly çözgütleriň doly tapgyryny — UI/UX dizaýnyndan we front-end ösüşinden başlap, motion-dizaýn, wizual şahsyýet we döredijilik konsepsiýalaryna çenli öz içine alýar. Studiýanyň esasy iş ýörelgesi — häzirki zaman wizual çemeleşmeleri oýlanyşykly strategiýa we her bir jikme-jiklige üns bermegiň utgaşmagydyr.

Zer Design web-studiýasynyň resmi saýty: https://zer.design

Sosial ulgamlardaky sahypasy.