Girmek
Nýu-Ýork şäheriniň «Türk öýünde» Türkmenistanyň we Özbegistanyň kinematografiýaçylarynyň türkmen halkynyň beýik akyldar şahyry Magtymguly Pyraga bagyşlanan bilelikdäki çeper filmi görkezildi. TÜRKSOÝ guramasynyň guramagynda geçirilen çäre köp sanly myhmanlary, şol sanda BMG-niň wekillerini we bu filme surata düşen artistleri ýygnady.
TÜRKSOÝ guramasynyň metbugat gullugynyň habar bermegine görä, filmiň görkezilişi «Türk dünýäsiniň medeni paýtagtlary» we «Magtymguly Pyragy» atly fotoserginiň açylyşy bilen başlandy. Myhmanlar bu ýerde goýlan suratlaryň üsti bilen türk dünýäsiniň baý medeni mirasy bilen tanyşdylar. Soňra Türk öýüniň maslahatlar zalynda ozal «Gorkut Ata» IV türk filmleriniň festiwalynda baş baýraga mynasyp bolan «Magtymguly Pyragy» atly çeper filmi görkezildi.
.jpg)
TÜRKSOÝ guramasynyň baş sekretary Sultan Raýew Türkmenistan bilen Özbegistanyň arasyndaky medeni gatnaşyklaryň möhümdigini belläp, çeper filmiň türk dünýäsiniň birliginiň nyşany bolandygyny nygtady. Ol 2025-nji ýylyň Türkmenistanda «Halkara parahatçylyk we ynanyşmak ýyly» diýlip yglan edilendigini ýatladyp, şeýle çäreleriň medeni arabaglanyşyklary berkitmäge we ýaş zehinleri goldamaga ýardam etjekdigine umyt bildirdi.