Girmek
Aşgabatda türkmen-italýan syýasy maslahatlaşmalary geçirildi. Oňa Türkmenistanyň Daşary işler ministriniň orunbasary Ahmet Gurbanow we Italiýanyň Daşary işler we halkara hyzmatdaşlyk ministriniň orunbasary Edmondo Çirielli gatnaşdylar. Gepleşikleriň dowamynda taraplar iki ýurduň arasynda bar bolan özara gatnaşyklaryň häzirki ýagdaýyny we geljegini ara alyp maslahatlaşdylar. Bu barada Türkmenistanyň daşary syýasat edarasy habar berýär.
Diplomatlar özara gyzyklanma bildirilýän sebit we halkara meseleleri boýunça pikir alyşdylar hem-de «Halkara parahatçylyk we ynanyşmak ýylynyň» çäklerinde bilelikdäki çäreleri geçirmegiň mümkinçiliklerini ara alyp maslahatlaşdylar.
Işewürler toparlarynyň wekilleriniň arasynda duşuşyklary we forumlary geçirmek bilen, söwda-ykdysady hyzmatdaşlygy giňeltmeklige aýratyn üns berildi. Şeýle hem arheologiýa, bilim we medeniýet ugurlarynda hyzmatdaşlygy pugtalandyrmak meseleleri ara alnyp maslahatlaşyldy.
Taraplar dürli ugurlarda syýasy gepleşikleri işjeňleşdirmäge we özara bähbitli hyzmatdaşlygy giňeltmäge bolan ikitaraplaýyn isleglerini tassykladylar.