Geçen ýyl paýtagtymyzda geçirilen dünýä çempionatynda hormat münberine 15 gezek çykan türkmenistanly kuraşçylar ýakynda Eýran Yslam Respublikasynda geçirilen Aziýanyň çempionatyndan hem medallaryň 11-si bilen dolanyp geldiler.

Munuň özi diýseň uly netijedir. Çünki türkmen ýygyndysy Ýer ýüzüniň 20 döwletinden 200-e golaý türgeni özünde jemlän yklym çempionatyna 14 türgen bilen gatnaşdy. Bu bolsa olaryň üçüsinden galanynyň hormat münberine çykandygyny görkezýär.

Şunda Çärjew etrabyndaky 2-nji sport mekdebiniň tälimçisi Aýşirin Haýdarowanyň gazanan üstünligini aýratyn nygtamak gerek. Zenanlaryň arasynda iň ýeňil agram derejesinde ― 48 kilograma çenli derejede ýaryş düşekçesine çykan ildeşimiz garşydaşlarynyň ählisinden üstün çykyp, Aziýanyň çempiony bolmagy başardy.

Şeýle hem yklym çempionatynda ýurdumyzyň zenanlar ýygyndysynyň agzalarynyň dördüsi we erkek kuraşçylaryň altysy hormat münberiniň üçünji basgançagyna çykdylar. Has takygy, zenanlaryň arasyndaky ýaryşda Çärjew etrabyndaky 24-nji orta mekdebiň okuwçysy Rozymeňli Meýmanowa, Türkmenabat şäherindäki 29-njy orta mekdebiň okuwçysy Sabina Kadyrowa, Saýat etrabyndaky 14-nji orta mekdebiň okuwçysy Nurana Hezretowa we Türkmenistanyň Içeri işler ministrliginiň işgäri Nursoltan Erniýazowa; erkekleriň arasyndaky ýaryşda bolsa Türkmen döwlet bedenterbiýe we sport institutynyň talyplary Serdar Babamyradow bilen Döwlet Hemrakulyýew, Goranmak ministrliginiň çagyryş boýunça harby gullukçysy Mekan Pardabaýew, Kerki etrabyndaky 22-nji orta mekdebiň bedenterbiýe mugallymy Daýanç Omirow, Ýagşygeldi Kakaýew adyndaky Halkara nebit we gaz uniwersitetiniň talyby Ylham Kemalow hem-de paýtagtymyzdaky 55-nji orta mekdebiň bedenterbiýe mugallymy Işanmyrat Ataýew dagylar bürünç medalyň eýesi boldular.