Girmek
Türkmenistanly tennisçi Aýlar Kakabaýewa ýakynda Katarda 14 ýaşa çenli ýetginjekleriň arasynda geçirilen halkara ýaryşyň jübütleýin duşuşyklarynda altyn medala mynasyp boldy. Ol bu üstünligi gazagystanly tennisçi Polina Suşkowa bilen bilelikde gazandy.
Ýarym finalda gazagystanly Arujan Erjanowa bilen kanadaly Ewa Sawinony 6:2, 6:3 hasabynda ýeňen Kakabaýewa ― Suşkowa jübüti çempiony kesgitlejek aýgytlaýjy duşuşykda hindistanly Honi Jumani Gaurawu Jumani bilen katarly Danu Halifuny 7:5, 6:0 hasabynda ýeňip, hormat münberiniň iň ýokarky basgançagyna çykdylar.
Sporta ýedi ýaşynda tötänlik bilen gadam goýan Aýlar häzirki wagtda paýtagtymyzdaky 10-njy sport mekdebinde Türkmenistanyň at gazanan tälimçisi Jennet Hallyýewadan tälim alýar. Geçen ýyl ol Türkmenistanyň milli ýygyndysynyň hatarynda Aşgabat şäherinde geçirilen Merkezi Aziýanyň birinjiliginde bürünç medala mynasyp bolupdy.
Mekdepde-de göreldeli okaýan tennisçi gyz her gün iki wagtyna türgenleşmäge hem wagt tapýar. Aýlaryň maksady geljekde has uly ýaryşlarda Watanymyzyň baýdagyny belende galdyrmak.