Türkmenistanda

1. Türkmenistanyň Prezidenti Serdar Berdimuhamedow Eýran Yslam Respublikasynyň Türkmenistanda täze bellenen Adatdan daşary we Doly ygtyýarly ilçisi Ali Mojtaba Ruzbehanini kabul etdi. Duşuşygyň dowamynda Prezident Serdar Berdimuhamedow hem-de Eýranyň ilçisi ikitaraplaýyn gatnaşyklaryň ileri tutulýan ugurlaryny ara alyp maslahatlaşdylar. Şunda abraýly halkara guramalaryň, ilkinji nobatda, BMG-niň çäklerindäki özara hyzmatdaşlyga aýratyn üns berildi. Şeýle-de ikitaraplaýyn hyzmatdaşlygyň mundan beýläk-de okgunly ösdüriljekdigine ynam bildirildi.

2. Duşenbe güni Türkmenistanyň Prezidenti Serdar Berdimuhamedow Ýaponiýanyň Türkmenistanda täze bellenen Adatdan daşary we Doly ygtyýarly ilçisi Sasaki Hirosini kabul etdi. Söhbetdeşlikde syýasy-diplomatik, söwda-ykdysady we medeni-ynsanperwer ulgamlarda iki ýurduň milli bähbitlerini göz öňünde tutmak arkaly netijeli hyzmatdaşlygy mundan beýläk-de ösdürmek bilen baglanyşykly meseleleriň giň toplumy ara alnyp maslahatlaşyldy.

3. Türkmenistanyň Prezidenti Serdar Berdimuhamedow ýurduň obasenagat toplumyna gözegçilik edýän wise-premýer T.Atahallyýewiň hem-de welaýatlaryň häkimleriniň gatnaşmagynda sanly ulgam arkaly iş maslahatyny geçirdi. Iş maslahatynda ýurduň oba hojalyk toplumynda hem-de welaýatlarynda alnyp barylýan işleriň barşy bilen bagly meselelere seredildi. Häzirki wagtda welaýatlarda ýetişdirilen pagta hasylyny ýygnap almak, welaýatlaryň bugdaý meýdanlarynda gögeriş suwuny tutmak, ekini mineral dökünler bilen iýmitlendirmek işleri, Daşoguz we Lebap welaýatlarynda ýetişdirilen şaly hasylyny ýitgisiz ýygnap almak, Mary welaýatynda bolsa gant şugundyrynyň hasylyny ýygnamak we ony gaýtadan işlemek boýunça ýerine ýetirilýän işler barada hasabatlar berildi.

4. Türkmenistanyň Gurluşyk we binagärlik ministrligi «Bagyr» ýaşaýyş toplumynda 200 adamlyk Medeniýet öýüni düýpli abatlamak boýunça bäsleşik yglan etdi. «Bagyr» Gadymy Nusaý taryhy ýadygärlikleriniň golaýynda Köpetdagyň eteginde ýerleşýän Türkmen paýtagtynyň ajaýyp künjeklerinden biridir.

5. Aşgabadyň Halkara howa menzilindäki onlaýn görkezme tablosy ýolagçylara halkara we içerki uçuşlaryň gelýän hem-de gidýän wagtlaryny yzarlamaga mümkinçilik berýär. Tablo häzirki wagtda täzelenip durýar, şonuň üçin uçuş maglumatlary hemişe häzirki wagtda beýan edilýär.

6. Şu gün Türkmenistanda «Bagtyýarlyk döwrüniň teatr sungaty» atly IV halkara festiwal badalga alýar. Şu mynasybetli hem Prezident Serdar Berdimuhamedow festiwala gatnaşyjylara Gutlag iberdi. Gutlagda: “Dünýä halklarynyň köp dürli medeniýetiniň, şeýle hem ruhy ýakynlygynyň kämilleşmegine özboluşly goşant goşjak bu festiwalyň işine uly üstünlik arzuw edýärin” diýlip bellenilýär.

Dünýä täzelikleri

7. Madrid uniwersitetinde işleýän ispan alymlary tarapyndan geçirilen barlag ýüz ýaşlylaryň umumy gabat gelýän häsiýet aýratynlyklarynyň bardygyny görkezdi. Bu barlaga 100 ýaşdan 107 ýaş aralygyndaky 14 müňden gowrak adam gatnaşdy. Netijede, alymlar gatnaşyjylaryň hemmesiniň 19 sany umumy häsiýetiniň bardygyny anykladylar, olaryň arasynda iň möhümi bilesigelijilikdir. Ýüz ýaşlylaryň ikinji iň möhüm häsiýeti şadyýanlykdyr. Bu hili adamlar hemişe durmuşa optimizmlik gözi bilen seredýärler we durmuşyň oňyn taraplaryny tapýarlar. Beýleki umumy häsiýetler dogruçyllyk, degişgenlik, ösen aň, sahawatlylyk, işjeňlik we gaýduwsyzlykdyr.

8. KAMAZ “Atlant 49” sürüjisiz, 8x4 tigirli agyr zibil awtoulagynyň prototipini synagdan geçirip başlady. Täze önüm “RoboCop” lakamyny aldy we kömür känlerinde ulanmak üçin niýetlenendir. 2023-nji ýylyň iýun aýynda KAMAZ eýýäm M-11 Newa awtoulag ýolunda sürüjisiz ýük awtoulaglaryny synagdan geçiripdi. Şol wagt awtoulagyň kabinasynda hereketi dolandyrýan synag inženeri bardy. Iýul aýynda X5 Group kompaniýasy sürüjisiz “Kamaz-54901” ýük awtoulaglaryny ulanyp, yzygiderli ýük daşap başlady.

Sport habarlary

9. Aşgabat tennis akademiýasy isleg bildirýänleriň ählisini Açyk gapylar gününe we höwesjeňleriň arasyndaky ilkinji ýaryşa gatnaşmaga çagyrýar. 19-njy noýabrda sagat 15:00-dan 19:00-a çenli aralykda klubda ulular we 4 ýaşdan uly çagalar üçin Açyk gapylar güni bolar. Bu tennisiň esaslaryny öwrenmek, tejribeli tälimçilerden gymmatly maslahatlar almak we diňe dostlukly ýagdaýda dynç almak üçin ajaýyp mümkinçilikdir. 18-nji we 19-njy noýabrda akademiýada tennis muşdaklarynyň arasynda ýaryş geçiriler. Bäsleşige ýazylmak we ähli maglumatlary anyklamak üçin baş emin Igor Zubkow bilen habarlaşyp bilersiňiz.

10. Türkmenistanly türgen Begenç Baltaýew Ýerewan (Ermenistan) şäherinde geçirilen sambo boýunça dünýä çempionatynda bürünç medala mynasyp boldy. Begenç Baltaýew ýaryşda sport sambosy görnüşi boýunça 79 kilograma çenli agram derejede çykyş edip, 24 türgeniň arasynda hormat münberinden orun almagy başardy. Bu agram derejede altyn medaly bolgariýaly Iwan Harkow eýeledi. Sambo boýunça dünýä çempionaty 12-nji noýabrda tamamlandy. Oňa 65 ýurtdan türgenler gatnaşdylar.