Girmek
Türkmenistanda
2. Türkmenistanyň Özbegistan Respublikasyndaky Medeniýet günleriniň çäklerinde beýik türkmen akyldary we şahyry Magtymguly Pyragynyň doglan gününiň 300 ýyllygyna bagyşlanyp, Özbegistanyň Ýazyjylar birleşiginiň binasynda türkmen we özbek ýazyjy-şahyrlarynyň döredijilik duşuşygy geçirildi. Oňa iki ýurduň şahyrlarydyr ýazyjylary, medeniýet we ylmy işgärleri, köpçülikleýin habar beriş serişdeleriniň wekilleri, şeýle hem Özbegistanda kowçum bolup ýaşaýan türkmenler gatnaşdylar.
3. Türkmen estradasynyň meşhur aýdymçylarynyň biri bolan Begmyrat Annamyradow ýekşenbe güni Koreýa Respublikasynyň paýtagty Seul şäherinde geçirilen «ABU TV Song Festival» aýdym-saz bäsleşik telefestiwalynda Türkmenistana wekilçilik etdi. Begmyrat Annamyradow abraýly aýdym-saz telefestiwalynyň çäklerinde «KBS Hall» sahnasynda «Arkadagly ak şäher» aýdymy bilen çykyş etdi. Festiwalda yklymyň 11 ýurdundan gelen sungat ussatlary türkmen aýdymçysy bilen bir sahnada çykyş etdiler. Festiwalyň ahyrynda ähli gatnaşyjylar bilen bir hatarda türkmen aýdymçysyna hem dabaraly ýagdaýda ýörite sylag gowşuryldy.
4. Türkmenistanyň Ministrler Kabinetiniň Başlygynyň orunbasary, daşary işler ministri bilen Gazagystan Respublikasynyň Premýer-ministriniň orunbasary, daşary işler ministriniň arasynda gepleşikler geçirildi. Gepleşikleriň barşynda ikitaraplaýyn syýasy-diplomatik, söwda-ykdysady we medeni-ynsanperwer gatnaşyklaryň möhüm ugurlary ara alyp maslahatlaşyldy. Syýasy-diplomatik gatnaşyklary mundan beýläkde işjeňleşdirmek maksady bilen, gepleşikleriň jemleri boýunça Türkmenistanyň Daşary işler ministrligi bilen Gazagystan Respublikasynyň Daşary işler ministrliginiň arasynda 2024-2026-njy ýyllar üçin hyzmatdaşlygyň maksatnamasyna gol çekildi.
Dünýäde
5. Tehas uniwersitetiniň psihologlary gaharyň çylşyrymly maksatlara ýetmek üçin güýçli itergi bolup biljekdigini anykladylar. Geçirilen synaglaryň aglabasynda gaharly adamlaryň güýç we üns talap edýän meselelerden has gowy baş alyp çykýandyklary mälim boldy. Synagda oňa gatnaşyjylara gahar-gazap döredýän wideolar görkezildi we bir topar söz bulaşyklyklaryny çözmek ýa-da wideo oýunlarynda ýokary bal gazanmak bilen bagly tabşyryk berildi.
6. Daşkent halkara howa menziliniň girelgesini indi 62 metr beýiklikdäki Özbegistanyň baýdagy bezeýär. Baýdak geçelgeden çykan ýeriňde aýlaw çatrygynyň ortasyna ýerleşdirildi. Uly baýdagyň töwereginde beýikligi 16 metr bolan 38 sany baýdak bar. Mundan başga-da, howa menzilinden çykanyňda tegelegiň öňünde gönüburçly panel görnüşindäki interaktiw çüwdürim ýerleşýär, sagda bolsa ullakan ekran bar. Häzirki wagtda howa menziliniň meýdanyny abadanlaşdyrmak işleri dowam edýär.
Sport täzelikleri
7. Balkan welaýatynyň Türkmenbaşy şäherinde 2009-2010-njy ýyllarda doglan ýaşlaryň arasynda basketbol boýunça — meşhur basketbolçylar Mered Gurbanowy we Anatoliý Prokini hatyralap açyk şäher basketbol çempionaty geçirildi. Bäsleşige Aşgabat, Daşoguz, Balkanabat, Türkmenbaşy we Hazar toparlary gatnaşdylar. Ýaş basketbolçylar ýeňiş üçin 4 günläp güýç synanyşdylar. Netijede, Hazar şäheriniň topary ýeňijiniň kubogyny alyp, ýaryşyň çempiony boldy.
8. Pariž şäherinde Fransiýanyň «France Football» gazeti tarapyndan geçen möwsümiň jemleri boýunça «Altyn top» baýragynyň gowşurylyş dabarasy geçirildi. Geçirilen ses berlişigiň netijelerine laýyklykda, baýraga ABŞ-nyň «Inter Maýami» klubynyň hem-de Argentinanyň milli ýygyndysynyň oýunçysy Lionell Messi mynasyp boldy.
9. Doha şäherinde Merkezi Aziýanyň Futbol assosiasiýasy (CAFA) bilen Bütinhindi Futbol federasiýasynyň arasynda özara düşünişmek hakynda Ähtnama gol çekişildi. Resminama dürli ugurlarda, hususan-da, başlangyçlary goldamak, ýaryşlary guramak, tejribe alyşmak hem-de futbol hünärmenleriniň bilimini artdyrmak boýunça hyzmatdaşlyk etmegi öz içine alýar. Ähtnama gol çekilmegi iki futbol assosiasiýasynyň arasyndaky gatnaşyklarda möhüm tapgyr boldy. Ähtnama gol çekmek dabarasyna Türkmenistanyň Futbol federasiýasynyň başlygy, CAFA-nyň wise-prezidenti Arslan Aýnazarow hem gatnaşdy.