Türkmenistanda

1. Režissýor Sapardurdy Annaýewiň filmi «Arkadagyň säheri» atly halkara kinofestiwalda birinji orny eýeledi. Sylag gowşuryş dabarasynyň çäklerinde ýeňijä «Akhan» binasynyň keşbindäki kubok dabaraly ýagdaýda gowşuryldy. Ýeňijileriň hataryndaky ilkinji üçlüge Gyrgyzystanyň we Gazagystanyň režissýorlary girdi. Mundan başga-da, sebitdäki kinonyň ösmegine goşan goşantlary üçin «TRT» teleýaýlymynyň Türkmenistandaky wekilhanasy, «Bozdag Group» türk kinokompaniýasy we Russiýanyň «RT Doc» studiýasynyň «Ahalteke» atly filmi baýraklara mynasyp boldular.

2. Russiýa Federasiýasynyň Hökümeti tarapyndan Türkmenistanyň raýatlary üçin 2024-2025-nji okuw ýylynda kesgitlenen ýerler (kwota) boýunça rus ýokary okuw mekdeplerinde bilim almak üçin arzalaryň kabul edişligi 1-nji dekabra çenli uzaldyldy. Russiýanyň ýokary okuw mekdeplerinde mugt bilim almak üçin ýüztutmalary tabşyrmak üçin Türkmenistanyň raýatlary education-in-russia.com saýtynda hasaba alynmaly. Munuň üçin elektron anketany doldurmaly we oňa daşary ýurt saparlary üçin pasportyňyzyň hem-de bilim hakyndaky resminamalaryňyzyň skanirlenen nusgalaryny goşmaly.

3. Gruziýanyň «Geosky Airlines» awiakompaniýasynyň uçary Türkmenabat halkara howa menziline ilkinji gonuşyny amala aşyrdy. Gruzin awiakompaniýasy Tbilisi (Gruziýa) – Çžençžou (Hytaý) – Türkmenabat (Türkmenistan) – Saragosa (Ispaniýa) – Tbilisi (Gruziýa) ugurlarynda ýük gatnawlaryny amala aşyrýar. Türkmenistanyň Gruziýadaky ilçisiniň «Geosky Airlines» awiakompaniýasynyň ýolbaşçylary bilen geçiren nobatdaky onlaýn duşuşygynda Türkmenabat halkara howa menziliniň Gruziýany Aziýanyň we Ýewropanyň şäherleri bilen baglanyşdyrjakdygyny bellendi.

4. 4-nji noýabrda Türkmenistanyň Döwlet medeniýet merkeziniň Mukamlar köşgünde türkmen we fransuz kompozitorlarynyň konserti geçiriler. Konserte Türkmenistanyň Döwlet simfoniki orkestri bilen çykyş etjek meşhur fransuz dirižýory Dewid Herpo ýolbaşçylyk eder.

5. Türkmenistanyň döredijilik toparlary Baku şäherinde Türki medeniýetiň halkara guramasynyň 30 ýyllygyna bagyşlanyp geçirilen dabaraly agşama we gala konserte gatnaşdylar. Agşamyň çeper bölegi Türkmenistandan, Azerbaýjandan, Türkiýeden, Gazagystandan, Gyrgyzystandan we Özbegistandan tansçylaryň, aýdymçylaryň, sazandalaryň, aktýorlaryň hem-de beýleki sungat işgärleriniň gatnaşmagynda geçirilen giň gerimli konsert maksatnamasyndan ybarat boldy.

Dünýäde

6. «Netflix» hususy haryt nyşanynyň harytlary satylýan oflaýn bölek söwda dükanlarynyň zynjyryny açmagy meýilleşdirýär. «Netflix House» dükanlary 2025-nji ýylda açylar. Olarda strim-hyzmatynyň seriýallarynyň sýužetleri boýunça attraksionlar, geýim we ýadygärlik sowgatlarynyň dükanlary, tematiki azyk restoranlary we «päsgelçilik zolagy» hereket eder. Ilkinji «Netflix House» dükanlary ABŞ-da peýda bolar, ýöne korporasiýa dünýäniň beýleki ýurtlarynda hem şuňa meňzeş nokatlary açmagy meýilleşdirýär.

7. Gazagystanyň 73 ýaşly ýaşaýjysy Sarsenbaý Kotyraşow dünýäde pyýada syýahat edýär we eýýäm Stambula baryp ýetdi. Aksakal syýahatyny mart aýynda dogduk şäheri bolan Ulytaudan başlady we oktýabr aýynyň başynda ol eýýäm Ankara ýetdi. Ol bu ýerde, Gazagystanyň Türkiýedäki ilçihanasynda mähirli garşylandy. Sarsenbaý Kotyraşow öz syýahatyny beýleki ýurtlaryň ýaşaýjylaryny Gazagystanyň däp-dessurlary we taryhy, Ulytau sebitiniň mukaddes ýerleri bilen tanyşdyrmak, gazak amaly-haşam sungatynyň ÝUNESKO-nyň sanawyna goşulmagyna goşant goşmak, şeýle hem Ginnesiň rekordlar kitabynda orun almak maksady bilen amala aşyrýar.

Sport habarlary

8. Gurban Berdiýewiň ýolbaşçylygyndaky «Dinamo» toparynyň futbolçylary Russiýanyň futbol boýunça çempionatynyň 14-nji tapgyrynyň oýnunda Noworossiýskiň «Çernomores» toparyndan üstün çykdylar. Duşuşyk Makhaçkaladaky «Anži-Arenada» geçirildi we ýer eýeleriniň peýdasyna 1:0 hasabynda tamamlandy. Şeýlelik bilen, türkmen hünärmeniniň topary 27 utuk toplady we Birinji ligada ikinji orna geçdi. Topar birinji orny eýeleýän «Alaniýadan» diňe bir utuk yzda barýar.

9. Eýranyň milli ýygyndysy dostluk duşuşygynbda Iordaniýanyň toparyndan üstün çykdy. Duşuşyk Ammanda geçirilip, myhmanlaryň peýdasyna 3:1 hasabynda tamamlandy. Eýranyň milli ýygyndysy Italiýanyň «Roma» toparynyň hüjümçisi Serdar Azmun bir gezek tapawutlanmagy başardy. Bu Azmunyň milli ýygyndydaky 46-njy goly boldy, indi ol toparyň taryhynda iň köp pökgi geçirmekde ikinji orundaky Karim Bageriden bary-ýogy dört gol yzda barýar.