Prezident Serdar Berdimuhamedowyň gol çeken Buýrugyna laýyklykda, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ýolbaşçylygyndaky türkmen wekiliýeti 2023-nji ýylyň 28-29-njy sentýabry günlerinde Germaniýa Federatiw Respublikasynda gulluk iş saparynda bolar.

"Watan" habarlar gepleşiginde habar berlişi ýaly, şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow iş sapary bilen Germaniýa Federatiw Respublikasyna ugramak üçin Aşgabadyň Halkara howa menziline geldi.
Türkmenistanyň Halk Maslahatynyň Başlygy Gurbanguly Berdimuhamedow bu ýerde Germaniýa Federatiw Respublikasynyň Türkmenistandaky Adatdan daşary we Doly ygtyýarly ilçisi bilen söhbetdeş boldy.

Diplomat türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy Türkmenistanyň Garaşsyzlygynyň 32 ýyllygy mynasybetli ýaýbaňlandyrylan dabaralar bilen gutlady. Ilçi Türkmenistanyň Halk Maslahatynyň Başlygyna Germaniýa Federatiw Respublikasyna saparynyň şowly geçmegini arzuw etdi.

Soňra türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň uçary Aşgabadyň Halkara howa menzilinden Germaniýa Federatiw Respublikasyna tarap ugur aldy.

Türkmenistanyň Halk Maslahatynyň Başlygy Gurbanguly Berdimuhamedowy resmi adamlar ugratdylar.