Türkmenistan

1. Türkmenistan we Kamboja syýahatçylyk pudagynda hyzmatdaşlygy giňeltmegiň mümkinçiliklerini ara alyp maslahatlaşýarlar. Hususan-da, ilçi Maşalowyň Kamboja Patyşalygynyň syýahatçylyk ministri Tong Khon bilen geçirilen duşuşygynda döwletleriň arasynda göni howa gatnawlaryny ýola goýmak meselesi ara alnyp maslahatlaşyldy.

2. Türkmenistanyň deňiz söwda floty Türkmenbaşynyň halkara deňiz portuna gelýän daşary ýurt gämilerine dizel ýangyjyny guýmak hyzmatlaryny hödürleýär. Gämilere ýangyç guýmak hyzmaty diňe bir Türkmenbaşy portunyň gämi duralgalarynda däl, eýsem, 78-nji ýol meýdançasynda hem hödürlenýär, bu bolsa syýahat wagtyny ep-esli tygşytlaýar we gämilere ýangyç guýlandan soň bellenen ugra tarap gitmäge mümkinçilik berýär. Bunkering, ýagny ýangyç guýmak hyzmaty «Serpaý» gämisi arkaly amala aşyrylýar, onuň daşary ýurt gämilerini ýangyçdan başga-da, agyz suwy we azyk bilen üpjün etmäge hem mümkinçiligi bardyr.

3. Türkmenistanyň Zähmet we ilaty durmuş taýdan goramak ministrligi «Elektron hasabat» atly sanly hyzmaty işe girizdi. Bu hyzmatyň kömegi bilen iş berijiler Zähmet we ilatyň iş bilen üpjünçiligi edaralaryna tabşyrylýan pudaklaýyn statistik hasabatlaryny onlaýn tertipde tabşyryp bilerler. Sanly hyzmatdan peýdalanmaga isleg bildirýän iş berijiler degişli Zähmet we ilatyň iş bilen üpjünçiligi bölümlerine ýüz tutup bilerler.

4. Türkmenistanyň Daşary işler ministrliginiň Halkara gatnaşyklary institutynda Türkmenistanyň ÝUNESKO-nyň agzalygyna kabul edilmeginiň 30 ýyllygyna bagyşlanan dabaraly maslahat geçirildi.

5. Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Aşgabat şäheri boýunça iş saparyny amala aşyryp, şäheriň günorta künjeginde ýerleşýän Magtymguly Pyragynyň medeni-seýilgäh toplumynyň çäklerinde alnyp barylýan işler hem-de paýtagty ösdürmegiň möhüm ugurlaryna degişli we beýik şahyryň 2024-nji ýylda belleniljek doglan gününiň 300 ýyllygynda aýratyn ähmiýete eýe bolan şekil taslamalary bilen tanyşdy.

Dünýäde

6. Özbegistanyň hökümeti daşary ýurtlular üçin raýatlyk almak işini ýeňilleşdirýän karar kabul etdi. Karara laýyklykda, daşary ýurtlular we raýatlygy bolmadyk şahslar döwlet hyzmat merkezleriniň üsti bilen raýatlyk alanda döwlet dilini bilmek derejesini kesgitlemek üçin ýüz tutup bilerler. Ozal daşary ýurtlular we raýatlygy bolmadyk şahslar döwlet dilini bilmek derejesini kesgitlemek üçin sebit synag topary bilen söhbetdeşlik geçmelidiler.

7. Maýaminiň şäher eteginäki ýaşaýjylaryna bu ýerde köpelen tawus guşlary päsgel berýärler. Guşlar gije gaty ses bilen gygyrýarlar, duralgada duran awtoulaglara zeper ýetirýärler we tezekleri bilen ähli ýeri hapalaýarlar. Ýerli häkimiýetler olaryň sanyny azaltmak üçin horaz tawuslary sterilizlemek (tohumsyzlandyrmak) kararyna geldiler. Adatça, sürüde birnäçe urkaçy we bir horaz bolansoň, bu uzak möhletleýin esasda tawuslaryň sanyny azaltmaga kömek etmelidir.

Sport habarlary

8. 22 – 31-nji awgust aralygynda Dubaýda (BAE) para pauerlifting boýunça dünýä çempionaty geçiriler, oňa 10 sany türkmen paralimpiýa türgenleri gatnaşarlar. Bu sport görnüşi daýanç-hereket ulgamynyň bozulmalary bolan adamlar üçin niýetlenendir, onda agramly ştanda göterilip, bedeniň ýokarky böleginiň güýji görkezilýär. Para pauerlifting boýunça dünýä çempionaty 2024-nji ýylda Parižde geçiriljek Tomusky Paralimpiýa oýunlarynyň saýlama tapgyrydyr.

9. Ýaponiýanyň Türkmenistandaky ilçisi Ýamamoto Hiroýuki Türkmenistanyň Dzýudo federasiýasynyň ýolbaşçysy Welmyrat Gurbanmyradow, şeýle hem dzýudo boýunça milli ýygyndynyň baş tälimçisi Kazuhiko Tokuno bilen duşuşyk geçirdi. Duşuşygyň dowamynda Hiroýuki Federasiýa Türkmenistanda dzýudony ösdürmekde we meşhurlygyny artdyrmakda bitirilen işler üçin Ýaponiýanyň daşary işler ministriniň Hormat hatyny gowşurdy. Ilçi Ýamamoto Hiroýuki türkmen dzýudoçylarynyň mundan beýläk hem halkara ýaryşlarynda, esasan-da 2024-nji ýylda Parižde geçiriljek Olimpiýa oýunlarynda üstünlik gazanmaklary babatda arzuwlaryny beýan etdi. Ol şu ýylyň ýazynda Aşgabat şäherine gelen we iki ýylyň dowamynda dzýudo boýunça Türkmenistanyň milli ýygyndysyny türgenleşdirjek Kazuhiko Tokuno üstünlik arzuw etdi.