Türkmenistanyň harby bölümlerinde iki ýyllyk gulluk möhletini tamamlan esgerleriň boşadylmagy mynasybetli dabaraly çäreler geçirilýär. Bu çäreler Türkmenistanyň Prezidenti Serdar Berdimuhamedowyň çagyryş boýunça harby gullugy geçýän harby gullukçylary Türkmenistanyň Ýaragly Güýçlerinden, beýleki goşunlaryndan we harby edaralaryndan harby gullukdan boşatmak we 2025-nji ýylyň oktýabr–dekabr aýlary aralygynda Türkmenistanyň raýatlarynyň harby gulluga nobatdaky çagyrylyşy hakynda Permanyna laýyklykda amala aşyrylýar.

Harby bölümlerde meýdançalara ähli şahsy düzümler — serkerdeler, seržantlar we esgerler hatara düzülýärler. Serkerdeler gullugyny tamamlan esgerleri gutlap, olaryň döwletimiziň garaşsyzlygyny, çäk bitewiligini we konstitusion gurluşyny gorap, harby borçlaryny abraý bilen ýerine ýetirendiklerini nygtaýarlar.

Dabaralarda söweş, ýöriş we jemgyýetçilik-ynsanperwer taýýarlyk boýunça tapawutlanan esgerlere aýratyn üns berilýär. Gullukdaşlarynyň, ýolbaşçylarynyň we garyndaşlarynyň gatnaşmagynda ýokary netijeleri görkezen esgerlere hormat hatlary we ýadygärlik sowgatlary gowşurylýar. Serkerdeler olaryň tertipliligini, jogapkärçiligini we ýurduň goranyş ukybyny berkitmekdäki goşandyny belleýärler.

Esger Wepa Hudaýberdiýew: «Bu iki ýyl hakyky durmuş mekdebi boldy. Biz köp zatlary öwrendik, has güýçli we kämilleşen adam bolduk. Watana gulluk edendigime buýsanýaryn» — diýip, aýtdy. Onuň gullukdaşy Çarymyrat Muhammedow bolsa: «Gulluk bize sabyrlylygy, özara goldawy we jogapkärçiligi öwretdi. Bu häsiýetler gündelik durmuşda hem peýdaly bolar» — diýip, belledi.

Esgerleriň köpüsi ýakyn günlerde öýlerine, öz maşgalalarynyň we ýakynlarynyň ýanyna gaýdyp bararlar. Ýurduň harby bölümlerinde harby gullukdan boşatmak dabaralary bellenilen tertibe laýyklykda çagyryş möwsüminiň barşynda dowam eder.