Şu gün Türkmenistanyň Prezidenti Serdar Berdimuhamedow «Euronews» telekompaniýasynyň direktorlar geňeşiniň başlygy Pedro Wargas Dawidi kabul etdi. Bu barada «Watan» habarlar gepleşiginde habar berildi.

Bellenilişi ýaly, duşuşykda myhman ak mermerli Aşgabadyň gözel keşbiniň özünde ýakymly täsir galdyrandygyny aýtdy.

Söhbetdeşlikde Ýewropanyň öňdebaryjy media düzümi bolan «Euronews» telekompaniýasy bilen Türkmenistanyň netijeli hyzmatdaşlygynyň oňyn tejribesi bellenildi.

Prezident Serdar Berdimuhamedow Türkmenistanyň medeni we taryhy mirasyny dünýä tanatmak hem-de syýahatçylygy ösdürmek ýaly ugurlarda «Euronews» telekompaniýasy bilen ikitaraplaýyn hyzmatdaşlygy ösdürmegiň maksadalaýyk boljakdygyny nygtady. Döwlet Baştutany Türkmenistanyň syýahatçylyk mümkinçilikleri barada hem aýratyn belläp geçdi we «Euronews» telekompaniýasynyň ýörite gepleşiklerinde Türkmenistan barada degişli wideofilmleriň görkezilýändigini aýtdy.

Duşuşygyň barşynda Türkmenistanyň Prezidenti «Euronews» telekompaniýasynyň direktorlar geňeşiniň başlygyny 12-nji dekabrda Aşgabatda geçiriljek Halkara parahatçylyk we ynanyşmak forumyna çagyrdy hem-de onuň gatnaşmagynyň bu halkara forumyň üstünlikli geçmegine uly goşant boljakdygyna ynam bildirdi.

Söhbetdeşligiň dowamynda halkara gün tertibiniň möhüm meseleleri hem-de özara hyzmatdaşlygyň çäklerinde ozal ýerine ýetirilen we geljekde göz öňünde tutulýan taslamalar barada-da pikir alşyldy.

Duşuşygyň ahyrynda Prezident Serdar Berdimuhamedow Türkmenistanyň geljekde hem «Euronews» telekompaniýasy bilen özara bähbitli hyzmatdaşlygy ösdürmäge taýýardygyny tassyklap, Pedro Wargas Dawide jogapkärli işinde üstünlikleri arzuw etdi.

Şeýle-de okaň:

• Gurbanguly Berdimuhamedow «Euronews» bilen hyzmatdaşlygyň esasy ugurlaryny kesgitledi

• «Euronews»-iň ýolbaşçysy Aşgabatda geçiriljek halkara foruma gatnaşar

• Türkmenistanda «Euronews»-iň habarçylaryny akkreditasiýa etmek we Aşgabatda habarçylar nokadyny açmak meýilleşdirilýär