Girmek
Ozal habar berşimiz ýaly, Monakonyň Monte-Karlo şäherinde 47-nji halkara sirk sungaty festiwaly geçirildi we oňa Türkmenistanyň «Galkynyş» milli at üstündäki oýunlar topary hem gatnaşdy.
«Watan» habarlar gepleşiginde habar berlişi ýaly, Türkmenistanyň «Galkynyş» milli at üstündäki oýunlar topary bu abraýly festiwalda üstünlikli çykyş edip, altyn baýraga we beýleki ýörite baýraklara mynasyp boldy.
19-20-nji ýanwarda Monako Knýazlygynda saparda bolan türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow saparynyň tamamlanan gününde Fransiýanyň Nissa şäheriniň Halkara howa menzilinde «Galkynyş» milli at üstündäki oýunlar toparynyň wekilleri bilen duşuşdy we olary gazanan uly üstünlikleri – Monte-Karloda halkara sirk sungaty festiwalynda türkmen tuguny belentde parladyp, baş baýraga mynasyp bolmaklary bilen gutlady.
Türkmenistanyň Halk Maslahatynyň Başlygynyň belleýşi ýaly, 2007-nji ýylda döredilen «Galkynyş» milli at üstündäki oýunlar topary dürli ýurtlarda geçirilen halkara sirk festiwallarynda 5 gezek baş baýraga mynasyp bolup, dünýä çempiony diýen belent derejä eýe boldy.