Türkmenistanda

1. Önümçilik senenamasyna laýyklykda, 2024-nji ýylda Türkmenistanda 12 sany işlenilmeýän baýramçylyk güni bolar. Olar Täze ýyl baýramy, Halkara zenanlar güni, Milli bahar baýramy, Türkmenistanyň Konstitusiýasynyň we Döwlet baýdagynyň güni, Oraza baýramy, Gurban baýramy, Garaşsyzlyk güni, Hatyra güni hem-de Halkara Bitaraplyk güni. Şu günleriň öňündäki günüň iş wagty Türkmenistanyň Zähmet kodeksiniň 61-nji maddasyna laýyklykda 1 sagat ir tamamlanar.

2. Türkmen halkynyň Milli Lideri Gurbanguly Berdimuhamedow şenbe güni Türkmenistanyň Söwda-senagat edarasyna baryp, bu ýerde ýaşlaryň dabaraly maslahatyna taýýarlyk görlüşi bilen tanyşdy. Maslahatyň ýokary derejede guralmalydygy bellenildi. Bu dabarada halkara sport ýaryşlarynda, mekdep okuwçylarynyň ders olimpiadalarynda, talyplaryň bäsleşiklerinde ýeňiji bolan türkmen ýaşlarynyň gazanan üstünlikleriniň jemi jemlener.

3. Türkmen oba hojalyk uniwersitetiniň wekiliýeti ozal gol çekilen resminamalaryň çäginde kärdeşleri bilen hyzmatdaşlygy pugtalandyrmak maksady bilen Eýrana bardy. Türkmen uniwersitetiniň wekilleri Eýran Yslam Respublikasynyň Gürgen Oba hojalygy ylymlary we tebigy baýlyklar uniwersitetinde gepleşik geçirdi. Taraplar bilim pudagynda düşünişmek hakyndaky Ähtnamanyň durmuşa geçirilişini ara alyp maslahatlaşdylar.

4. Prezident Serdar Berdimuhamedowyň BMG-niň Howanyň üýtgemegi baradaky Çarçuwaly konwensiýasyna gatnaşyjy taraplaryň 28-nji maslahatyna gatnaşmak üçin Birleşen Arap Emirliklerine amala aşyran iş sapary tamamlandy. Düýn BMG-niň Bütindünýä howa sammitinde çykyş edip, döwlet Baştutany Türkmenistanyň şu maslahata gatnaşmagyna özüniň howanyň üýtgemegi meselesi boýunça halkara strategiýasyny ilerletmekde tapgyrlaýyn waka hökmünde garaýandygyny nygtady. BAE iş saparynyň çäklerinde Türkmenistanyň Prezidentine mukaddes Gurhanyň aýatlary altyn suw bilen ýazylan ýörite sowgat gowşuryldy. «COP28» maslahatynyň möhüm çäreleriniň BAE-niň Milli güni bilen gabat gelendigini bellemek gerek. Prezident Serdar Berdimuhamedow Birleşen Arap Emirlikleriniň baş baýramy mynasybetli dabaralara gatnaşdy. Birleşen Arap Emirliklerine iki günlük iş sapary tamamlanandan soňra, Türkmenistanyň Prezidenti Watanyna ugrady.

Dünýäde

5. Bilermenler dünýäniň iň gymmat şäherleriniň sanawyny täzelediler. Sanawda Sýurih we Singapur birinji orny paýlaşdylar. Ikinji orunda Nýu-Ýork, üçünji orunda Ženewa ýerleşdi. Şeýle hem ilkinji onluga Gonkong, Pariž we Los-Anjeles şäherleri girdi. Hünärmenler sanawy düzmek üçin ýaşaýyş jaýlarynyň kärendesiniň, azyk harytlarynyň, jemagat hojalygy, lukmançylyk we ulag hyzmatlarynyň bahasyny göz öňünde tutdular. Sanawyň awtorary ýaşamak üçin iň arzan megapolisler hökmünde Damask we Tähran şäherlerini bellediler.

6. 2023-nji ýylyň dekabry Täleýnamanyň üç ýyldyzy üçin maliýe taýdan amatly aý bolar. Astrologlar Akraplaryň (içýan), Jedileriň (owlak) we Balyklaryň girdejileriniň artmagyna, şeýle hem çykdajylarynyň netijeli dolandyrylmagyna garaşyp biljekdiklerine ynanýarlar.

Sport habarlary

7. «Arkadag» futbol toparynyň futbolçylary Aşgabatda «Altyn asyrdan» üstün çykyp, Ýokary liganyň klublarynyň arasynda Türkmenistanyň çempiony diýen ada möhletinden öň eýe boldular. Ýekşenbe güni «Nusaý» stadionynda geçirilen oýun Wladimir Baýramowyň şägirtleriniň peýdasyna 4:0 hasabynda tamamlandy. «Arkadag» 60 utuk toplady, ýaryşyň tamamlanmagyna 4 tapgyr galsa-da, ikinji orunda barýan «Altyn asyr» üçin bu netijäniň yzyndan ýetmek mümkin däldir. Bu «Arkadag» toparynyň taryhyndaky ilkinji çempionlykdyr.

8. 5-nji dekabrda AFK Çempionlar ligasynyň toparçalaýyn tapgyrynyň jemleýji, altynjy aýlawy geçiriler, onda «Ahal» türkmen topary we «Al-Aýn» arap topary bilen duşuşar. Duşuşyk Aşgabatda geçiriler we sagat 19:00-da başlar. «Aşgabat» köpugurly stadionda boljak duşuşygyň öňüsyrasynda ýaryşa gatnaşyjylar açyk türgenleşikleri geçirerler we žurnalistleriň soraglaryna jogap bererler. Metbugatyň wekilleri bilen toparlaryň baş tälimçileri we kapitanlary söhbetdeş bolarlar. Ýatlatsak, Emirlikleriň «Al-Aýn» toparynyň baş tälimçisi meşhur argentinaly Ernan Krespodyr.