Türkmenistanda

1. Türkmenistanyň Prezidenti Serdar Berdimuhamedow YHG-nyň ýurtlaryna iberilýän tebigy gazyň hem-de elektrik energiýasynyň möçberini artdyrmaga ýurduň taýýardygyny aýtdy. «Men öz tarapymdan, häzirki wagtda bar bolan we geljekde guruljak kuwwatlyklar arkaly YHG-nyň ýurtlaryna iberilýän tebigy gazyň hem-de elektrik energiýasynyň möçberini artdyrmaga Türkmenistanyň taýýardygyny aýdyp bilerin» diýip, Türkmenistanyň Prezidenti Daşkent şäherinde geçirilen Sammitiň dowamynda belledi.

2. TM-CELL öýjükli aragatnaşyk kompaniýasy Aşgabatda geçirilýän «Türkmentel – 2023» halkara sergisinde öz müşderilerine täze hyzmaty — wirtual belgileri hödürledi. Wirtual belgi – bu jübi telefonynyň ýa-da stasionar telefonyň SIM kart bilen baglanyşykly bolmadyk belgisi bolup durýar. Bu belgini QR kody arkaly işjeňleşdirip bolýar. Munuň üçin internete birikmeli we QR-y skanirlemeli, soňra karty smartfonyňyzyň sazlamalarynda işjeňleşdirmeli.

3. 10-njy noýabrdan 3-nji dekabra çenli aralykda Türkmenistanda Ýewropa Bileleşiginiň Medeniýet hepdeligi geçiriler. Çäreler Maryda we Aşgabatda guralar. Medeniýet hepdeligi Magtymguly adyndaky Milli sazly drama teatrynda geçiriljek konsert bilen açylar.

4. Aşgabatdaky «Bagtyrlyk» sport toplumynda Hindistanyň Türkmenistandaky ilçihanasy tarapyndan gurnalan «Bitewi saglyk üçin Aýurweda» atly okuw sapagy geçirildi. Durmuş baradaky bu gadymy ylym boýunça bilermen doktor Patila ýygnananlara Aýurwedanyň peýdalary barada gürrüň berdi. Okuw sapagyna 100-den gowrak adam gatnaşdy.

5. Türkmenistanda her ýylyň noýabr aýynyň ikinji ýekşenbesinde bellenilýän Hasyl toýynyň öňüsyrasynda ýurduň Döwlet medeniýet merkeziniň Döwlet muzeýinde mowzuklaýyn serginiň açylyş dabarasy boldy. Serginiň maksady daýhanlaryň, maldarlaryň, bagbanlaryň zähmetini beýan etmekden, döwlet tarapyndan olaryň işine berilýän ähmiýeti açyp görkezmekden ybaratdyr.

Dünýäde

6. Tokio şäherinde hiç zat etmezlik boýunça Ýaponiýanyň taryhyndaky ilkinji ýaryş geçirildi. Oňa mekdep okuwçylaryndan başlap, pensionerlere çenli jemgyýetiň dürli gatlaklardan 107 adam gatnaşdy. Şerte görä, ýaryşa gatnaşyjylar 90 minutlap hiç zat etmeli däl we şol bir wagtyň özünde, uklamaly hem däl. Olara smartfon ulanmak, okamak, gürleşmek, hatda sagatlaryna seretmek hem gadagan edildi.

7. Daşkent şäherinde adaty bolmadyk myhmanhana – öýsüz pişikler üçin niýetlenen 12 otagly pişik öýjagazy açyldy. Pişik öýjagazy gyş möwsüminde köçe pişikleri üçin ýyly gonalga bolar. Myhmanhana «Watan» kiçi etrapçasynda meýletinçileriň başlangyjy we ýaşaýjylaryň razylygy bilen guruldy. Taslama Daşkendiň Milli gwardiýasy tarapyndan gözegçilik edilýär.

Sport habarlary

8. «Altyn asyr» futbol topary AFK-nyň Kubogynyň toparçalaýyn tapgyrynyň dördünji aýlawynda öz meýdançasynda geçirilen duşuşykda «Merwden» üstün çykdy. Duşuşyk Aşgabatda geçirilip, ýer eýeleriniň peýdasyna 1:0 hasabynda tamamlandy. Bu duşuşygyň ýeke-täk pökgüsi 34-nji minutda derwezä girizildi. Oraz Orazow Ahmet Ataýewiň pasy bilen toparyny öňe saýlady. Ikinji ýarymda «Merwiň» oýunçylary garşydaşlara edilýän basyşy artdyrmaga synanyşdylar, ýöne gol salmak üçin birnäçe ajaýyp mümkinçilikden peýdalanyp bilmediler.

9. Italiýanyň «Inter», «Milan» we Angliýanyň «Çelsi» toparlarynda çykyş eden Argentinanyň milli ýygyndy toparynyň öňki hüjümçisi Ernan Krespo «Al-Aýnyň» baş tälimçisi wezipesine bellendi. Krespo 48 ýaşynda. Onuň iň soňky işlän ýeri Kataryň «Al-Duhail» toparydyr. «Al-Aýn» AFK Çempionlar ligasynyň 2023/24-nji möwsümdäki çempionatynda Türkmenistanyň «Ahal» toparynyň toparçalaýyn tapgyrdaky garşydaşydyr.