Girmek
Türkmenistanyň çempionatynyň we Kubok ýaryşynyň öňde duran oýunlaryna Bolgariýada taýýarlyk görýän «Arkadag» futbol topary bu ýerdäki okuw-türgenleşik ýygnanyşygynyň çäklerinde Demirgazyk Makedoniýanyň «Besa» topary bilen ýoldaşlyk duşuşygyny geçirdi.
«Arkadagyň» taryhyndaky ilkinji halkara ýoldaşlyk duşuşygy 1:1 hasabyndaky deňlik bilen tamamlandy. Duşuşykda türkemn toparynyň goluny Ýokary liganyň şu möwsüminiň iň netijeli futbolçysy (12 gol) Didar Durdyýew geçirdi.
Şeýlelikde, şu ýylyň aprel aýynda döredilen topar ilkinji halkara synagynda hem garşydaşdan ýeňilmedi. Toparyň bu duşuşykdaky garşydaşy ― «Besa» futbol topary Demirgazyk Makedoniýanyň ikinji dwizionyna wekilçilik edýär.
Ýeri gelende aýtsak, «Arkadag» futbol topary Bolgariýa 21-nji iýulda gitdi. Toparyň bu döwletdäki türgenleşikleri 8-nji awgustda tamamlanar. Okuw-türgenleşik ýygnanyşygynyň çäklerinde topar ýoldaşlyk duşuşyklarynyň başga-da birnäçesini geçirer.
Yzda galan dokuz tapgyrda 24 utuk toplan «Arkadag» futbol toparynyň Türkmenistanyň çempionatynyň başyny çekýändigini ýatladýarys. Türkmenistanyň kubogynda hem ýarym finala çykan topar bu tapgyrda Aşgabadyň «Altyn asyrynyň» garşydaşy boldy.