Girmek
«Turkmenportala» mälim bolşuna görä, futbol boýunça Türkmenistanyň milli ýygyndysy sentýabr aýynda Gonkongyň ýygyndysy bilen ýoldaşlyk duşuşygyny geçirmegi meýilleşdirýär.
Häzirki wagtda Türkmenistanyň Futbol Federasiýasy DÇ-2026-nyň saýlama tapgyry üçin taýýarlyk görmek maksady bilen degişli ýoldaşlyk duşuşygyny guramak boýunça gepleşikleri geçirýär.
Ýeri gelende bellesek, Türkmenistan taryhda iki gezek Gonkong bilen duşuşdy. Iki oýun hem DÇ-2010-uň saýlama tapgyrynyň çäklerinde geçirilip, Gonkongdaky duşuşyk 0:0 hasabynda deňlikde, Aşgabatdaky gapma-garşylyk bolsa 3:0 hasabynda Türkmenistanyň ýeňşi bilen tamamlanypdy.
Maglumat üçin, sentýabrdaky ýoldaşlyk duşuşygy üçin Türkmenistanyň ähtimaly garşydaşy häzirki wagtda 2024-nji ýylda geçiriljek Aziýa Kubogyna taýýarlyk görýär. Gonkongly futbolçylar yklym birinjiliginde BAE-niň, Eýranyň we Palestinanyň ýygyndylary bilen güýç synanyşarlar.
Ozal habar berşimiz ýaly, DÇ-2026-nyň Aziýa yklymy boýunça saýlama tapgyryna bijeler 27-nji iýulda Malaýziýanyň Kuala-Lumpur şäherindäki AFK-nyň ştab-kwartirasynda çekiler. Türkmenistanyň milli ýygyndysy DÇ-2026-nyň saýlamasyna ikinji tapgyrdan girişer.