Girmek
Şu gün Türkmenistanda resmi saparda bolýan Özbegistan Respublikasynyň Prezidenti Şawkat Mirziýoýew günüň ikinji ýarymynda Aşgabatdaky «Halk Hakydasy» ýadygärlikler toplumynda «Baky şöhrat» ýadygärligine gül dessesini goýdy.
Aşgabat şäheriniň günorta-günbatar künjeginde ýerleşýän «Halk Hakydasy» ýadygärlikler toplumynda dostlukly döwletiň Baştutanyny Aşgabat şäheriniň häkimi garşylady.
Bu ýerde 1941 — 1945-nji ýyllaryň Beýik Watançylyk urşunda edermenligiň, gahrymançylygyň, gaýduwsyzlygyň nusgasyny görkezenleriň hatyrasyna bina edilen «Baky şöhrat» ýadygärligine gül desseleri goýuldy we deňsiz-taýsyz gahrymançylyga tagzym edildi. Şol urşuň agyr synaglaryny başdan geçiren türkmenistanlylaryň müňlerçesi doganlyk halklar bilen birlikde dünýäde parahatçylygyň, abadançylygyň hatyrasyna söweş meýdanlarynda gahrymançylyk görkezdiler.
Soňra belent mertebeli myhman ýadygärlikler toplumynda ýerleşýän «Watan mukaddesligi» muzeýine baryp gördi we Hormatly myhmanlar kitabynda ýadygärlik ýazgy galdyrdy.