Girmek
18-nji martda Aşgabatda ýurdumyzyň hususy pudagyna maýa çekmeklige bagyşlanan «Türkmenistanyň geljegine maýa goýumlary» atly halkara forumy öz işine başlady. Bu çäre «Ýyldyz» myhmanhanasynda geçirilip, ol döwlet edaralarynyň, halkara guramalarynyň, daşary ýurt kompaniýalarynyň we ýerli kärhanalaryň wekillerini bir ýere jemledi.
Forumy Türkmenistanyň Senagatçylar we telekeçiler birleşmesiniň (TSTB) müdiriýetiniň agzasy Kerim Akmämmedow açdy. Dabaranyň çäklerinde Türkmenistanyň hususy pudagynyň gazananlaryna bagyşlanan wideofilm görkezildi.
Forumda Türkmenistanyň Ministrler Kabinetiniň Başlygynyň orunbasary Nökerguly Atagulyýew gutlag sözi bilen çykyş etdi.
Forumyň maksatnamasy kiçi we orta telekeçiligi goldamak, oba hojalygyna innowasiýalary ornaşdyrmak, şeýle hem senagat, gurluşyk, ulag we syýahatçylyk ýaly ugurlary ösdürmekde hususy pudagyň ornuna bagyşlanan birnäçe tematiki toparlara bölünýär. Foruma gatnaşyjylar halkara tejribesini we hyzmatdaşlygyň geljegini ara alyp maslahatlaşarlar we täze taslamalary we maýa goýum tekliplerini hödürlärler.
Forum ikitaraplaýyn resminamalara gol çekmek we türkmen kompaniýalarynyň täze önümleri hem-de maýa goýum başlangyçlary bilen tanyşdyrmak çäresi bilen tamamlanar.