Russiýa Federasiýasynyň Türkmenistandaky ilçihanasy öz resmi saýtynda Russiýada telefon sim kartlarynyň dolanyşygynyň täze düzgünleri baradaky maglumaty ýerleşdirdi. Bu düzgünlere görä, şu ýylyň 1-nji ýanwaryndan başlap, daşary ýurt raýatlaryna we raýatlygy bolmadyk şahslara sim kartlaryny satmagyň aýratyn talaplary göz öňünde tutulýar.

Hususan-da, sim kartlar daşary ýurt raýatynyň ýa-da raýatlygy bolmadyk adamyň şahsyýetini tassyklaýan resminamany görkezmek hem-de ЕСИА (Şahsyýeti kesgitlemegiň we tassyklamagyň bitewi ulgamy) hem-de ЕБС (Bitewi biometrik ulgam) arkaly şahsyýet baradaky maglumatlaryň dogrulygyny tassyklamak şerti bilen satylýar. Mundan başga-da, aragatnaşyk hyzmatlaryny bermek hakyndaky şertnama sim-kartdan peýdalanylmagy göz öňünde tutulýan ulanyjylyk enjamynyň (telefon, planşet we ş.m.) identifikatory (IMEI) baradaky maglumatlary öz içine almalydyr.

Şeýle hem şertnama internet arkaly däl-de, diňe ýüzbe-ýüz baglaşylyp bilner. Daşary ýurt raýaty ýa-da raýatlygy bolmadyk şahs 10-dan köp öýjükli aragatnaşyk belgisini satyn alyp bilmez.

Bu daşary ýurt raýatlaryna degişli bolan çäklendirmeler daşary ýurtlaryň diplomatik wekilhanalarynyň, konsullyk edaralarynyň we halkara guramalarynyň wekilhanalarynyň işgärlerine, daşary ýurt diplomatik we gulluk pasportlarynyň eýelerine, şeýle hem ähli ýokarda agzalyp geçilenleriň maşgala agzalaryna degişli däldir.

Şu ýylyň 1-nji ýanwaryndan telefon belgisi üçin anonim nagt tölegini tölemek gadagan edildi.

Mundan başga-da, 2025-nji ýylyň 1-nji aprelinden:

• daşary ýurt raýatlary we raýatlygy bolmadyk şahslar sim kartlaryny satyn alanlarynda bu barada Döwlet hyzmatlary portalynda we sms- habary arkaly habardar edilerler;
• daşary ýurt raýatynyň ýa-da raýatlygy bolmadyk şahsyň Döwlet hyzmatlary portalyndaky şahsy otagynda onuň adyna bellige alnan ähli telefon belgileri görkeziler. Şol bir wagtyň özünde, bu şahs Döwlet hyzmatlary portalynda telefon belgisinden ýüz öwrüp biler.

Russiýada telefon sim kartlarynyň dolanyşygynyň täze düzgünleri barada jikme-jik maglumatlar bilen siz şu ýerde tanşyp bilersiňiz.