Gurbanguly Berdimuhamedowyň Täjigistana resmi sapary başlandy, Türkmenistanyň Prezidenti Döwlet howpsuzlyk geňeşiniň mejlisini geçirdi, «Arkadag» ähli ýaryşlarda ýeňilmezden yzly-yzyna 35 oýun oýnady we beýleki habarlar
Türkmenistanda
1. Şu gün irden türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow resmi sapar bilen Täjigistan Respublikasyna ugrady. Saparyň çäklerinde ýokary döwlet derejesinde türkmen-täjik duşuşyklarynyň we gepleşikleriniň geçirilmegi göz öňünde tutulýar. Türkmenistan we Täjigistan ikitaraplaýyn hyzmatdaşlygyň giň ugurlaryny ara alyp maslahatlaşarlar. Duşuşykdan we ýokary derejedäki gepleşiklerden soň ikitaraplaýyn hyzmatdaşlyk hakynda täze resminamalaryň birnäçesine gol çekilmegine garaşylýar.
2. Türkmenistanyň Prezidenti, Türkmenistanyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň nobatdaky mejlisini geçirdi. Onda ýurduň harby we hukuk goraýjy edaralarynyň şu ýylyň üç aýynda ýerine ýetiren işleriniň netijelerine garaldy. Şeýle-de gün tertibine Garaşsyz döwletde howpsuzlygy, asudalygy üpjün etmek, harby we hukuk goraýjy edaralaryň maddy-enjamlaýyn binýadyny pugtalandyrmak, olaryň işini mundan beýläk-de kämilleşdirmek bilen baglanyşykly meseleler girizildi.
3. Döwlet howpsuzlyk geňeşiniň mejlisiniň dowamynda döwlet Baştutany prokurorlary wezipä bellemek we wezipeden boşatmak bilen bagly Permanlara gol çekdi. «Türkmenistanyň prokuraturasy hakynda» Kanunyň 16-njy maddasyna laýyklykda, 1-nji derejeli ýurist Şadurdy Hangeldiýewiç Täşliýew Ahal welaýatynyň prokurory wezipesine bellenildi. Gulluk borçlaryny talabalaýyk ýerine ýetirmändigi üçin, ýustisiýanyň kiçi geňeşçisi Merdan Mahmudowiç Pirbabaýew Ahal welaýatynyň prokurory wezipesinden boşadyldy.
4. Aşgabatda Türkmenistanyň we Gazagystanyň gaz kompaniýalarynyň ýolbaşçylarynyň arasynda gaz pudagynda ikitaraplaýyn hyzmatdaşlygy pugtalandyrmak boýunça gepleşikler geçirildi. Duşuşyk «QazaqGaz» milli kompaniýasynyň müdiriýetiniň başlygy Sanžar Žarkeşow bilen Türkmenistan Ministrler Kabinetiniň Başlygynyň orunbasary Batyr Amanow hem-de «Türkmengaz» döwlet konserniniň başlygy Maksat Babaýewiň arasynda geçirildi. Netijeli ýagdaýda geçen gepleşikleriň dowamynda taraplar gaz ýataklaryny bilelikde özleşdirmek, iki ýurduň çäginde gaz geçiriji taslamalaryny durmuşa geçirmek we özara bähbitli esasda tebigy gazyň üpjünçiligini ýola goýmak ýaly geljegi uly ugurlary ara alyp maslahatlaşdylar.
5. Duşenbede Türkmenistanyň Täjigistan Respublikasyndaky Medeniýet günleriniň açylyş dabarasy boldy. Bu giň gerimli döredijilik çäresi türkmen-täjik döwletara gatnaşyklarynyň mundan beýläk-de ösdürilmegine möhüm goşant bolar. Açylyş dabarasy Täjigistanyň Sadriddin Aýni adyndaky opera we balet akademiki döwlet teatrynda geçirildi. Dabara iki dostlukly ýurduň degişli ministrlikleriniň ýolbaşçylary hem-de wekilleri, medeniýet, sungat, ylym-bilim ulgamlarynyň we köpçülikleýin habar beriş serişdeleriniň işgärleri gatnaşdylar.
6. Türkmenistanyň Söwda-senagat edarasynda ýurduň söwda toplumynyň sergisi açyldy, sergide ýurduň kärhanalarynyň we düzümleriniň iki ýüzden gowragy milli ykdysadyýetiň üstünliklerini, mümkinçiliklerini we geljegi uly ösüş ugurlaryny görkezýärler. Gözden geçirilişiň açylan güni türkmen halkynyň Milli Lideri Gurbanguly Berdimuhamedow sergä baryp gördi we dokma toplumynyň dürli ekologiýa taýdan arassa we ýokary hilli önümleri, şeýle hem dürli gön önümleriniň görkezilen nusgalary bilen tanyşdy.
Dünýäde
7. «Samsung» kompaniýasy Ýewropanyň Kosmiki agentligi bilen hyzmatdaşlykda «Galaxy Watch» «akylly» sagatlary üçin taýýarlan «Galaxy Time» siferblatyny tanyşdyrdy. «Galaxy Time-yň» kömegi bilen indi diňe bir Ýeriň däl-de, eýsem, Mars, Wenera, Ýupiter hem-de Gün ulgamynyň beýleki planetalaryndaky wagty hem bilmek bolýar. Siferblat mundan başga-da birnäçe peýdaly maglumatlary: planetalaryň aýlanyş tizligini hem-de olaryň Günden näçe aralyk uzakdadygyny; her planetanyň hemrasyny we olaryň möwsümleriniň aýratynlyklaryny; planetanyň Gün ulgamynda anyk ýerleşýän ýerini görkezýär
8. Alymlar tarapyndan geçirilen matematiki modelirlemä laýyklykda, 500 ýyldan soň ähli ýaponlar diňe bir familiýany – Sato familiýasyny göterip biler. Häzirki wagtda Sato ýurtda iň giň ýaýran familiýa bolmak bilen, ony ilatyň 1,5% töweregi göterýär. Ýaponiýada kanun aýaly durmuşa çykandan soň äriniň familiýasyna geçmäge borçly edýär. Häzirki ösüş meýilleri dowam etse, bu familiýanyň kem-kemden beýlekileriň ornuny tutjakdygy çaklanylýar. Eger kanunlar gowşadylsa we aýallara durmuş gurandan soň gyzlyk familiýasyny saklamaga rugsat berilse, ýagdaýlar üýtgäp biler.
Sport habarlary
9. Futbol boýunça Türkmenistanyň Ýokary ligasynyň 5-nji tapgyry janköýerlere köp sanly gyzykly wakalary sowgat etdi. «Arkadag» «Aşgabady» uly hasap bilen ýeňip, ýene bir rekord goýdy, «Altyn asyr» derbi duşuşygynda «Ahaldan» üstün çykyp, möhüm ýeňiş gazandy, «Şagadam» paýtagtyň beýleki toparyny ýeňlişe sezewar etdi, «Merw» bolsa «Energetik» bilen derbi duşuşygynda üç utugy adyna ýazdyrdy. 5-nji tapgyra jemi 17 gol geçirildi. «Arkadag» öňdäki orny eýeleýär, ondan soň «Ahal», «Merw» we «Şagadam» barýar.
