Girmek
Türkmenistanyň ýokary okuw mekdepleriniň mugallymlary ÝUNESKO-nyň goldawy astynda ýokary bilim ulgamyndaky innowasiýalar boýunça halkara merkezi (UNESCO-ICHEI) tarapyndan guralan «Pedagoglaryň mümkinçiliklerini giňeltmek bilen: döredijilikli emeli aňyň (EA) okatmakda we öwrenmekde gizlin ukyplaryny açmak» atly sanly ulgam arkaly geçirilen maslahata gatnaşdylar. Bu barada «Altyn asyr» elektron gazetindeň habar berildi.
Maslahaty Haragpurdaky Hindi tehnologiki institutynyň öňdebaryjy tehnologiýalary we işläp taýýarlamalary merkeziniň dosenti, pedagogiki okuw we howaýy başarnyklary merkeziniň başlygynyň orunbasary Kauşal Kumar Bhagat alyp bardy.
Hünärmeniň çykyşy maslahata gatnaşyjylara emeli aňyň okatmakda we öwrenmekde ulanylmagy boýunça düşünjelerini, bilimlerinidir tejribesini ep-esli giňeltmäge, çuňlaşdyrmaga mümkinçilik berdi.
Alyp baryjy anyk mysallara daýanyp, döredijilikli emeli aňy okuw prosesine netijeli ornaşdyrmak, emeli aň arkaly sapaklary guramagyň we meýilleşdirmegiň täze çemeleşmeleri, bilimi bahalandyrmagyň döwrebap ulgamy, şahsy öwreniş we döredijilikli mazmuny işläp taýýarlamak barada gürrüň berdi.
Ýokary okuw mekdepleriniň mugallymlary çäräniň dowamynda mowzuklaýyn gepleşiklere we ara alyp maslahatlaşmalara işjeň gatnaşdylar.