«Tejenkarbamid» zawodyny döwrebaplaşdyrmak çäresiniň çäginde Türkmenbaşy deňiz portuna ýurduň taryhynda iň iri ölçegden çykýan ýükleriň biri getirildi – ol Amerikanyň we Kanadanyň bilelikdäki «Babcock & Wilcox» kompaniýasy tarapyndan öndürilen, sagatda 160 tonna bug öndürýän orta basyşly bug gazanydyr. Enjamyň agramy 140 tonnadan ýokary, ölçegleri bolsa uzynlygy 9 metrden, beýikligi 8 metrden, ini 6 metrden gowrak.

Bu enjamy ýerine eltmek we soňraky gurnama işleri «Turkmen enjam» hojalyk jemgyýeti tarapyndan ýerine ýetirilýär. Kompaniýa «Tejenkarbamid» zawodynyň önümçilik kuwwatlyklaryny düýpli abatlaýyş we bölekleýin döwrebaplaşdyrma arkaly taslama kuwwatyna çykarmagy maksat edinýär. Täze enjam iň ýokary energiýa tygşytlylyk, ekologiýa we ygtybarlylyk standartlaryna laýyk gelýär.

«Biz Türkmenistana ABŞ-dan, Germaniýadan we Şweýsariýadan öňdebaryjy tehnologiýalary getirýäris. Her bir taslama iň berk hil talaplaryna laýyklykda, doly taýýar görnüşde ýerine ýetirilýär» - diýip, «Turkmen enjam» HJ-de belleýärler.

2008-nji ýyldan bäri kompaniýa Türkmenistanyň Senagatçylar we telekeçiler birleşiginiň agzasy bolup, himiýa, energetika we gurluşyk pudaklarynda 25-den gowrak iri taslamany amala aşyrdy. Olaryň arasynda ýurduň çäginde sekiz sany demir-beton zawodynyň döwrebaplaşdyrylmagy we ýylda 1 mln tonna kuwwatly Köýtendagda sement zawodynyň gurluşygy bar (ol 2024-nji ýylyň mart aýynda Türkmenistanyň Prezidenti tarapyndan açyldy).