Girmek
Türkmenistanyň milli ýygyndysynyň kapitany Elman Tagaýew Aziýanyň Kubogy – 2027 saýlama tapgyrynda Hytaý Taýbeýine garşy geçirilen duşuşykda (3:1) geçiren goluny şikes alan topardaşyna – Şanazar Tirkişowa bagyşlandygyny aýtdy.
«Oýundan öň şikes alan Şanazar Tirkişow bilen jaňlaşdyk, eger gol geçirsem, 14-nji belgini görkezjek diýip, men oňa söz berdim» — diýip, Tagaýew duşuşykdan soňky metbugat ýygnagynda belledi.
Duşuşygyň 53-nji minutynda Türkmenistanyň milli ýygyndysynyň kapitany owadan urgudan soň topy garşydaşynyň derwezesine girizip, hasapda 2:1 öňe çykardy. Derwezäni almak bilen bir wagtda Tagaýew ýarym goragçy Teýmur Çaryýew bilen bilelikde meýdançanyň gyrasyna ylgap, Çaryýewiň arkasyndaky 14-nji belgini görkezdi – bu belgide adatça şikes alan Tirkişow çykyş edýär.
Tagaýew üçin bu gol Aziýanyň Kubogy – 2027 saýlama tapgyryndaky üçünji goly boldy. Hytaý Taýbeýi bilen geçirilen duşuşykda gazanylan ýeňiş Türkmenistanyň milli ýygyndysyna 12 utuk bilen D toparçasynda liderligini saklamaga mümkinçilik berdi. Biziň ýygyndymyz goşmaça görkezijiler boýunça Taýlanddan öňe geçýär.