Girmek
Russiýa, Gyrgyzystan we Özbegistan «Russiýa — Hazar deňzi — Türkmenistan — Özbegistan — Gyrgyzystan» halkara multimodal ulag geçelgesini ösdürmegi maksat edinýär. Bu barada «nCa» internet portaly habar berdi.
Habarda bellenilişi ýaly, 1-nji noýabrda Daşkentde Şanhaý Hyzmatdaşlyk Guramasyna agza ýurtlaryň Ulag forumy geçirildi. Forumda Özbegistanyň Ulag ministri ihlom Mahkamowyň, Russiýanyň Ulag ministriniň orunbasary Dmitriý Zwerewiň hem-de Gyrgyzystanyň Ulag we kommunikasiýalar ministri Tilek Tekebaýewiň arasynda «Russiýa — Hazar deňzi — Türkmenistan — Özbegistan — Gyrgyzystan» halkara multimodal ulag geçelgesini ösdürmek baradaky Ähtnama gol çekildi.
Ozal habar berlişi ýaly, «Russiýa — Hazar deňzi — Türkmenistan — Özbegistan — Gyrgyzystan» halkara multimodal ulag geçelgesi ýa-da «Günorta ulag geçelgesi» Gyrgyzystanyň günortasyndan Özbegistana, soňra Türkmenistana — Hazar deňzindäki Türkmenbaşy portuna geler we bu ýerden hem demirgazyk tarapa — Astrahana gider.
Belläp geçsek, şu ýylyň ýanwar aýynda Türkmenistanyň, Gyrgyzystanyň, Russiýanyň we Özbegistanyň ygtyýarly guramalarynyň we kärhanalarynyň wekilleriniň arasynda bu geçelge bilen baglanyşykly dört taraplaýyn gepleşikler geçirilipdi.