«Türkmenistanyň nebitgaz pudagy – 2026» atly XXXI halkara maslahata we sergä (OGT 2026) görülýän taýýarlyk işleri jemleýji tapgyra gadam basdy. Forumyň guramaçylary halkara gatnaşyjylaryň hasaba alyş işleriniň rekord derejede ýokary depgin bilen dowam edýändigini habar berýärler.

Soňky maglumatlara görä, «OGT 2026» forumyna gatnaşjakdygyny 400-den gowrak adam tassyklady. Olaryň 300-den gowragy takmynan 40 ýurtdan gatnaşýan halkara wekilleridir. Hasaba alyş işi dowam edýär we guramaçylar gatnaşyjylaryň sanynyň mundan beýläk-de artmagyna garaşýarlar. Türkmen bazaryna ilkinji gezek gyzyklanma bildirýän kompaniýalaryň sanynyň artýandygy aýratyn bellenilýär. Forumyň işine 100-den gowrak kompaniýanyň ilkinji gezek gatnaşmagyna garaşylýar.

«OGT 2026» forumynyň sergi bölümi üçin niýetlenen ýerleriň ählisi eýýäm satyldy, ýagny elýeterli ähli sergi meýdançalary paýlanyldy. Daşary ýurtlaryň arasynda iň uly sergi diwarlyklarynyň biri Malaýziýanyň pawilýony bolar. Onda 20-den gowrak kompaniýa birleşer we olaryň köpüsi Türkmenistanda ilkinji gezek öz tehnologiýalaryny we hyzmatlaryny hödürlär. Hytaýyň işewürleriniň hem gatnaşmagy giň gerimli bolar. Muňa iki ýurduň gaz pudagyndaky köpýyllyk strategik hyzmatdaşlyk ýardam edýär. Şeýle hem Malaýziýanyň «PETRONAS» kompaniýasynyň Türkmenistanda köp ýyllaryň dowamynda alyp barýan işi ýurduň nebitgaz pudagyndaky üstünlikli halkara hyzmatdaşlygyň mysallarynyň biri hökmünde aýratyn bellenilýär.

Forum 21–23-nji oktýabrda Aşgabatda «Energiýa. Hyzmatdaşlyk. Ösüş.» şygary bilen geçiriler. Oňa döwlet edaralarynyň wekilleri, milli we halkara energetika kompaniýalarynyň ýolbaşçylary, maýadarlar, maliýe edaralarynyň, tehnologiýa kompaniýalarynyň wekilleri hem-de pudaklaýyn bilermenler gatnaşar.

Forumyň gün tertibinde «Galkynyş» gaz känini mundan beýläk-de özleşdirmek, Türkmenistan–Owganystan–Pakistan–Hindistan (TAPI) gaz geçirijisi taslamasy, Türkmenistanyň Hazar deňziniň ýalpaklyk zolagynyň geljegi, gazy gaýtadan işlemek we nebitgaz-himiýa, maýa goýumlar, sanlylaşdyrmak, emeli aň, şeýle hem metanyň zyňyndylaryny azaltmak we häzirki zaman ekologiýa tehnologiýalary ýaly meseleler orun alar. Maksatnamanyň möhüm bölegi Türkmenistanyň döwlet edaralary bilen halkara işewür toparlarynyň arasynda geçiriljek B2B we B2G duşuşyklaryna bagyşlanar.

Forumyň işini dünýäniň we pudagyň öňdebaryjy köpçülikleýin habar beriş serişdeleri, şol sanda «Euronews», «Energy Intelligence» we «Petroleum Economist» ýaly neşirler giňden beýan eder.

Daşary ýurtly myhmanlar üçin guramaçylar medeni maksatnamany hem taýýarladylar. Onuň çäklerinde Aşgabat şäheriniň gözel ýerlerine, Türkmen halysynyň milli muzeýine we Türkmenistanyň taryhy-medeni ýadygärligi bolan gadymy Nusaý şäherine gezelençler guralar.

Şeýle hem resmi kabul edişlikler meýilleşdirilýär. Olaryň hatarynda forumyň gatnaşyjylary üçin ýörite tagamlaryň sanawyny taýýarlajak «Gül Zaman» restoranynda geçiriljek kabul edişlik hem bar.

«OGT 2026» forumyna gatnaşmak isleýän wekilleriň hasaba alynmagy dowam edýär.