Türkmenistanyň Garaşsyzlygynyň 35 ýyllygy mynasybetli geçirilen Türkmenistanyň Awtomobil sporty federasiýasynyň Kubogy ugrundaky ralli-reýdde Maksatmyrat Danatarowyň dolandyran «Nissan Patrol» awtoulagyndaky ekipažy ýeňiş gazandy. Ol Türkmenistanyň Awtomobil sporty federasiýasyna wekilçilik etdi.

Ýaryş 19–20-nji sentýabrda Garagum sährasynyň Ahal we Mary welaýatlarynyň çäklerinde geçirildi. Ýaryş ýolunyň umumy uzynlygy 372 kilometre deň boldy.

Ýaryşa jemi dokuz sany sport awtoulagy gatnaşdy. Olaryň bäşisi Türkmenistanyň Awtomobil sporty federasiýasynyň, üçüsi Türkmenistanyň Içeri işler ministrliginiň Ahal, Mary we Lebap welaýatlary boýunça Polisiýa müdirlikleriniň, ýene biri bolsa Türkmenistanyň Awtomobil ulaglary ministrliginiň adyndan çykyş etdi.

Türkmenistanyň Awtomobil sporty federasiýasynyň toparynyň beýleki bir ekipažy — Meýlis Abdyllaýewiň dolandyran «Nissan Patrol» awtoulagy ikinji orny eýeledi.

Üçünji orun Ahal welaýatynyň Polisiýa müdirliginiň Çaryýar Çaryýarowyň dolandyran «Toyota Hilux» awtoulagyndaky ekipažyna degişli boldy.

Ýaryşyň ýeňijilerine we baýrakly orunlary eýelän türgenlere Kuboklar we Hormat hatlary gowşuryldy.