Londonyň «Arsenal» topary Angliýanyň futbol çempionatynyň täze möwsüminiň ilkinji duşuşygynda «Kowentri Siti» toparyndan ynamly üstün çykdy. Londonda geçirilen duşuşyk ýurduň häzirki çempionynyň 3:0 hasabyndaky ýeňşi bilen tamamlandy. Gollary Kaý Hawers (15-nji minutda), Bukaýo Saka (23-nji minutda) we Martin Ede­gor (49-njy minutda) geçirdi. Indiki tapgyrda «Arsenal» 31-nji awgustda myhmançylykda «Aston Willa» bilen duşuşar. «Kowentri» bolsa 29-njy awgustda öz meýdançasynda «Hall Siti» toparyny kabul eder.

ABŞ-nyň Esasy futbol ligasynyň (MLS) Düzgün-nyzam komiteti «Inter Maýami» toparynyň argentinaly hüjümçisi Lionel Messä «Filadelfiýa Ýunýon» toparynyň oýunçysy Kuinn Salliwanyň kellesine urandygy üçin jerime saldy. Bu barada liganyň resmi saýty habar berýär. Waka 2:2 hasabynda tamamlanan duşuşygyň dowamynda bolandygy bellenilýär. Goşmaça wagtyň dowamynda futbolçylaryň arasynda oňuşmazlyk ýüze çykypdyr, Messi şonda garşydaşynyň ýeňsesine urupdyr. Şol bir wagtyň özünde komitet çaknyşyk netijesinde gyzyl duýduryş alan Salliwanyň bir oýundan çetleşdirmek barada çykaran kararyny ýatyrdy.

Malaýziýanyň «Johor Darul Tazim» kluby milli çempionatdaky yzygiderli ýeňlişsiz duşuşyklaryň sany boýunça dünýä rekordyny täzeledi. Anna güni topar Malaýziýanyň Superkubogy ugrundaky we ýurduň çempionatynyň hasabyna girizilýän duşuşykda «Kuçing Siti» toparyndan 3:0 hasabynda üstün çykdy. Bu ýeňiş klubuň çempionatdaky ýeňlişsiz 109-njy duşuşygy boldy. Şeýlelikde, «Johor» 1989–1994-nji ýyllar aralygynda yzly-yzyna 108 duşuşykda ýeňilmedik Kot-d’Iwuaryň «ASEK Mimozas» toparynyň rekordyndan öňe geçdi.

Saud Arabystanynyň «Al-Nasr» topary ýurduň futbol çempionatynyň ikinji tapgyrynda myhmançylykda «Er-Riýad» toparyndan 4:0 hasabynda üstün çykdy. Gollary Abdul­ela al-Amri (18-nji minutda), Anželo Gabriel (45+1), Žuan Feliks (58-nji minut) we Kristianu Ronaldu (83-nji minutda) geçirdi. «Al-Nasr» çempionatyň başynda yzly-yzyna ikinji ýeňşini gazandy. «Altyn top» baýragynyň bäş gezek eýesi Ronaldu bolsa 977-nji goluny geçirdi.

Beýik Britaniýanyň premýer-ministri Endi Bernem 2042-nji ýylyň futbol boýunça dünýä çempionatyny Beýik Britaniýanyň çäginde geçirmek baradaky başlangyjy öňe sürdi. Bu barada «The Times» gazeti habar berdi. Neşiriň berýän maglumatyna görä, Bernem bu teklibi Mançesterdäki täze premýer-ministrlik edarasynyň binasynda şäherleriň häkimleri bilen geçirilen duşuşygynda öňe sürüpdir. Şeýle hem ol mümkin bolan arza tabşyrmak meselesi boýunça Angliýanyň Futbol assosiasiýasy we Angliýanyň Premýer-ligasy bilen gepleşikleri eýýäm geçirýär. Mundan başga-da, Bernemiň hökümeti 2040-njy ýylyň Olimpiýa we Paralimpiýa oýunlaryny geçirmek üçin hem arza tabşyrmaga taýýarlanýar.

Halkara futbol federasiýasynyň (FIFA) Düzgün-nyzam komiteti 2026-njy ýyldaky dünýä çempionatynyň finalynyň netijeleri boýunça Argentinanyň milli ýygyndysynyň üç futbolçysyna jerime we çetleşdirme jezalaryny berdi. Bu barada guramanyň metbugat gullugy habar berdi. Ýarym goragçy Leandro Paredes 10 duşuşykdan çetleşdirildi we oňa 90 müň dollar jerime salyndy. Goragçy Nauel Molina 7 duşuşykdan çetleşdirilip, oňa 90 müň dollar jerime aldy. Ýarym goragçy Tiago Almada bolsa bir duşuşykdan çetleşdirilip, ol 30 müň dollar jerime tölemeli bolar. Bu çäreler finalyň soňky jürlewügi çalnandan soň Paredesiň ispan futbolçylary bilen bolan çaknyşygyndan soň kabul edildi. Ol goragçy Erik Garsiýanyň bokurdagyndan tutup, ýarym goragçy Gawini itekledi. Şeýle hem Argentinanyň tälimçiler toparynyň agzasy Roberto Aýala 30 müň dollar jerime salnyp, üç duşuşykdan çetleşdirildi. Ispaniýanyň milli ýygyndysynyň ýarym goragçysy Gawi hem edil şonuň ýaly jeza aldy. Dünýä çempionatynyň finalynda Ispaniýanyň ýygyndysy goşmaça wagtda Argentinadan 1:0 hasabynda üstün çykdy.

Ýewropa futbol assosiasiýalarynyň birleşigi (UEFA) bilen Demirgazyk we Merkezi Amerika hem-de Karib basseýniniň Futbol konfederasiýasy (KONKAKAF) milli ýygyndylar üçin umumy ýaryşy geçirmek mümkinçiligine seredýärler. Bu barada «The Guardian» öz çeşmelerine salgylanyp habar berýär. Neşiriň berýän maglumatyna görä, ýaryşa iki konfederasiýanyň düzümindäki 96 milli futbol assosiasiýasynyň ählisiniň ýygyndylary gatnaşyp biler. Ýaryşy 2028-nji ýyldan başlap her iki ýyldan bir gezek, Ýewropa çempionatyndan dessine soň geçirmek meýilleşdirilýär.

Ýaryşyň formaty UEFA-nyň we KONKAKAF-yň Milletler ligalarynyň gurluşyna meňzeş bolup, birnäçe diwiziondan, pleý-off tapgyryndan we dört toparyň gatnaşmagyndaky final ýaryşyndan ybarat bolup biler. Geljekde bu taslama Aziýanyň Futbol konfederasiýasy (AFC) hem goşulyp biler.