19-njy awgustda Nýu-Ýorkda Türkmenistanyň BMG-niň ýanyndaky hemişelik wekili Wepa Hajiýewiň Halkara Migrasiýa Guramasynyň (HMG) BMG-niň ýanyndaky edarasynyň direktory Pýar Lilýert bilen duşuşygy geçirildi.

Duşuşygyň dowamynda taraplar Türkmenistan bilen HMG-niň arasyndaky hyzmatdaşlygy pugtalandyrmaga aýratyn üns berdiler. Şunuň bilen baglylykda,  söhbetdeşler bilelikdäki işiň geljegi uly ugurlaryny maslahatlaşdylar. Mundan başga-da, sebit gün tertibiniň möhüm meselelerine, ynsanperwer ulgamyň we migrasiýa syýasatynyň esasy ugurlaryna garaldy.