Madridiň «Real» toparynyň ozalky baş tälimçisi Zinedin Zidan täze işe bellendi. 54 ýaşly hünärmen Fransiýanyň milli futbol ýygyndysyna baş tälimçi boldy. Bu barada ýurduň Futbol federasiýasy özüniň sosial ulgamlardaky resmi sahypalarynda habar berdi.

Ozal taraplaryň arasynda baglaşylan zähmet şertnamasynyň 2030-njy ýyla çenli hereket etjekdigi barada habar berlipdi. Zidan bu wezipede 2026-njy ýylyň dünýä çempionatyndan soň milli ýygyndy bilen işini tamamlan Didýe Deşamyň ornuny eýeledi.

Demirgazyk Amerikada geçirilen soňky dünýä çempionatynda Fransiýanyň milli ýygyndysy ýarym finala çenli çykmagy başardy. Finala çykmak ugrundaky duşuşykda Fransiýanyň ýygyndysy Ispaniýanyň milli ýygyndysyndan 0:2 hasabynda ýeňildi. Üçünji orun ugrunda geçirilen oýunda bolsa fransuzlar Angliýanyň milli ýygyndysyna 4:6 hasabynda utuldy.

Klub derejesinde Zinedin Zidan Madridiň «Real» toparyna iki gezek — ilkinji gezek 2016–2018-nji ýyllarda, ikinji gezek bolsa 2019–2021-nji ýyllarda ýolbaşçylyk etdi. Şol döwürde ol klub bilen bilelikde 11 kubok gazandy, şol sanda UEFA-nyň Çempionlar ligasynyň üç gezek ýeňijisi boldy. Hünärmeniň tälimçilik ýolundaky arakesme 2021-nji ýyldan bäri dowam edip gelýärdi.