Halkara ynsanperwer ylymlary we ösüş uniwersitetinde VI Açyk halkara matematika olimpiadasy — OMOUS-2026 üstünlikli tamamlandy. Bäş günüň dowamynda geçirilen bäsleşiklerde dokuz döwletiň 600-den gowrak talyby şahsy we toparlaýyn hasaplarda 370-den gowrak medal ugrunda bäsleşdi.

Akyl-paýhas bäsleşiklerine Russiýadan, Özbegistandan, Täjigistandan, Eýrandan, BAE-den, Germaniýadan, Gresiýadan, Wengriýadan we Niderlandlardan gelen wekiller gatnaşdy. Maksatnama iki görnüşi öz içine aldy: şahsy çykyşlar — A we B derejelerinde — hem-de toparlaýyn ýaryşlar.

Türkmen talyplary öý meýdançasynda ynamly çykyş edip, jemi 211 medal gazandy: şahsy derejelerde 33 altyn, 69 kümüş we 96 bürünç medal, şeýle-de toparlaýyn hasapda 2 altyn, 5 kümüş we 6 bürünç medala mynasyp boldy. Özbegistanyň ýygyndysy 103 şahsy we 10 toparlaýyn baýrak gazandy. Russiýaly gatnaşyjylar esasan toparlaýyn ýaryşlarda tapawutlandy: 9 topar 4 altyn, 2 kümüş we 1 bürünç medal gazandy, şahsy birinjilikde bolsa olar A derejesinde 13 altyn medaly eýeledi.

Günbatar ýurtlarynyň arasynda Gresiýanyň, Niderlandlaryň, Germaniýanyň we Wengriýanyň talyplary aýratyn tapawutlanyp, olaryň her biri B derejesinde altyn medal gazandy.

Ýapylyş dabarasynda ýeňijilere we baýrakly orunlary eýelänlere altyn, kümüş we bürünç medallar, şeýle hem hormat diplomlary gowşuryldy. Çykyş edenler bu olimpiadanyň ýurtlaryň arasynda akademiki hyzmatdaşlygy berkitmekdäki ähmiýetini aýratyn bellediler.

«Matematika — logiki pikirlenmegiň dili we dünýä düşünmegiň açarydyr. OMOUS-2026 bize diňe bir bäsleşmäge däl-de, eýsem dürli ýurtlardan pikirdeşleri tapmaga-da mümkinçilik berdi» — diýip, baýraga mynasyp bolan talyplaryň biri aýtdy.

Medeni maksatnamanyň çäklerinde daşary ýurt wekiliýetleri Aşgabadyň binagärlik ýadygärlikleri we Türkmenistanyň taryhy mirasy bilen tanyşdylar. Guramaçylar gatnaşyjylary 2027-nji ýylda geçiriljek VII olimpiadada ýene-de garşy almaga umyt bildirdiler.