Iýul aýynyň ahyrynda Türkmenabat halkara howa menzili adaty bolmadyk uçary kabul etdi. Bu uçaryň bort belgisi RA-76503 bolan, göwrümi giň Il-76TD-90WD kysymly ýük daşaýjy uçar bolup, onda uly harplar bilen ANTARCTICA diýen ýazgy ýerleşdirilipdir. Uçar «Ak­ruks» awiakompaniýasyna degişli bolup, polýar gözlegçisi Artur Nikolaýewiç Çilingarowyň adyny göterýär. Howa menziliniň sosial ulgamdaky sahypasynda berilýän habara görä, uçar yklymara uçuşyň çäklerinde Türkmenabat howa menzilinde tehniki gonuşy amala aşyryp, ýangyç aldy. Şeýle uzak aralyga uçuş ugur meýilnamasynyň we aralyk duralgalaryň örän takyk guralmagyny talap edýär.

Uçaryň ekipažy Türkmenabat howa menzilini üstaşyr uçuşyň esasy nokatlarynyň biri hökmünde saýlapdyr. Arktikanyň we Antarktidanyň aşa kyn şertlerinde uçuşlaryň uçarmanlardan iň ýokary derejede ünsli bolmagy talap edýändigini göz öňünde tutup, howa menzili ekipaž üçin doly derejeli dynç alşy we zerur ýerüsti hyzmatlaryň toplumyny üpjün edipdir.

Howa menziliniň hünärmenleriniň bellemegine görä, şeýle kysymly uçarlaryň kabul edilmegi howa menziliniň dürli çylşyrymly we ýöriteleşen ugurlarda işleýän awiakompaniýalara hyzmat etmäge taýýardygyny görkezýär. Bu bolsa howpsuzlygy, işleriň dessinligini we hyzmatlaryň ýokary derejesini üpjün etmäge mümkinçilik berýär.

«Ak­ruks» awiakompaniýasy 2025-nji ýylda hasaba alnyp, Arktikanyň, Antarktidanyň we Ýer ýüzüniň beýleki uzak hem-de barmasy kyn sebitlerine uçuşlary amala aşyrmak boýunça ýöriteleşýär. Awiakompaniýanyň ady şol bir atdaky Ak­ruks (Alpha Crucis) ýyldyzy bilen baglanyşyklydyr. Ol Günorta Haç ýyldyzlar toplumyndaky iň ýagty ýyldyz bolup, däp bolşy ýaly, Günorta polýusa tarap ugry görkezýär.

Türkmenabatda gonan Il-76TD-90WD  kysymly ýük uçary sowet we rus polýar gözlegçisi, Sowet Soýuzynyň Gahrymany we Russiýanyň Gahrymany Artur Çilingarowyň adyny göterýär. Ol Antarktida tarap amala aşyrylan yklymara uçuşlara ýolbaşçylyk edipdi.