Çarşenbe güni, 12-nji awgustda, Türkmenistanyň «Arkadag» futbol kluby öz meýdançasynda AFK-2 Çempionlar ligasynyň deslapky tapgyrynyň çäklerinde Hindistanyň «Goa» futbol kluby bilen duşuşar. Oýun ýerli wagt bilen sagat 20:00-da başlanar we «Arkadag» stadionynda geçiriler. Stadiona giriş mugt. Girişiň tölegsiz bolmagy we tomaşaçylaryň uly gyzyklanma bildirmegine garaşylýandygy sebäpli, stadiona baryp, oýna tomaşa etmek isleýän janköýerlere orunlaryny duşuşyk başlanmaka öňünden eýelemek maslahat berilýär.

Häzirki wagtda resmi brodkasterlar (ýaýlyma berijiler) bu duşuşygyň göni teleýaýlym ýa-da striming arkaly görkeziljekdigini entek tassyklamadylar. Täzelenen maglumat oýnuň başlanmagyna golaý wagtda peýda bolar.

Bu duşuşygyň nähili ähmiýeti bar?

Aziýanyň klublar arasyndaky ýaryşlarynyň ähmiýeti boýunça ikinji orunda durýan ýaryşyň toparçalaýyn tapgyrynda çykyş etmek hukugy ugrunda Türkmenistanyň çempiony Hindistanyň Superkubogynyň eýesi «Goa» bilen bäsleşer. Ýaryşyň düzgünlerine laýyklykda, duşuşykda ýeňiş gazanan topar AFK-2 Çempionlar ligasynyň toparçalaýyn tapgyryna ýollanma alar, ýeňilen topar bolsa halkara möwsümini AFK-nyň Çagyryş ligasynyň toparçalaýyn tapgyrynda dowam etdirer.

Aziýanyň klublar ýaryşlarynyň täze möwsüminde Türkmenistanyň AFK-nyň Çagyryş ligasynyň toparçalaýyn tapgyrynda wekilçilik etjekdigi eýýäm kepillendirildi. Bu hukuk 2025-nji ýylyň Türkmenistanyň çempionatynyň kümüş medalyna eýe bolan «Ahal» klubyna degişli bolup, ol ýaryşa göni ýollanma aldy. Indi türkmen futbolynyň AFK-2 Çempionlar ligasynda hem wekiliniň bolmagy üçin mümkinçilik bar. Munuň üçin «Arkadag» hindi klubyndan üstün çykmaly bolar.

Bu duşuşyk «Arkadag» üçin şu möwsümdäki iň möhüm oýunlaryň birine öwrülip biler. Ýeňiş Wladimir Baýramowyň tälim berýän şägirtlerine ýene-de yklymyň güýçli klublarynyň arasynda AFK-2 Çempionlar ligasynda çykyş etmäge mümkinçilik berer. Ýeňliş bolsa topar üçin halkara ýaryşdaky çykyşyny Çagyryş ligasynda dowam etdirmäge ýol açar. AFK-2 Çempionlar ligasynyň 2026/27 möwsüminiň toparçalaýyn tapgyrynyň sentýabr aýynda başlanmagy meýilleşdirilýär. Hut 12-nji awgustda «Arkadagyň» Türkmenistanyň adyndan Aziýanyň güýç babatda ikinji bolan klublar ýaryşynda ýene-de çykyş edip-etmejekdigi belli bolar.

«Arkadagyň» halkara tejribesi

Türkmen kluby Aziýanyň täze möwsümine baý halkara tejribesi bilen gelýär. 2024/25 ýylyň möwsüminde «Arkadag» AFK-nyň Çagyryş ligasynda ýeňiji bolup, taryhynda ilkinji halkara klub kubogyny gazandy. Bu üstünlik topar üçin 2025/26 ýylyň möwsüminde AFK-2 Çempionlar ligasyna ýol açdy. «Arkadag» bu ýaryşda hem mynasyp çykyş edip, toparçalaýyn tapgyrda ýedi utuk toplady, öz toparynda ikinji orny eýeledi we pleý-off tapgyryna çykdy.

Türkmen klublarynyň hindi garşydaşlaryndan üstün çykan taryhy

Öňde boljak duşuşygyň halkara arenasynda türkmen toparlarynyň hindi klublary bilen üstünlikli duşuşyklarynyň taryhyny dowam etdirmegine garaşylýar.

2018-nji ýylda «Altyn Asyr» AFK Kubogynyň sebitara ýarym finalynda «Bengaluru» toparyny ynamly ýeňip, iki duşuşygyň netijesi boýunça 5:2 hasabynda üstün çykypdy. 2024-nji ýylyň awgust aýynda Aşgabat şäheriniň kluby AFK-2 Çempionlar ligasynyň saýlama tapgyrynda Kalkuttada «Ist Bengal» toparyndan 3:2 hasabynda üstün çykdy. Birnäçe aýdan soň şol hindi klubyny eýýäm «Arkadag» AFK-nyň Çagyryş ligasynyň çärýek finalyndan çykardy. 2025-nji ýylyň sentýabrynda bolsa «Ahal» kluby Kalkuttada Hindistanyň iň güýçli klublarynyň biri bolan «Mohun Bagan» toparyny 1:0 hasabynda ýeňdi.

Şeýle-de bolsa, häzirki garşydaş topara kembaha garamak bolmaz. «Goa» Hindistanyň Superkubogynda ýeňiş gazanyp, AFK-2 Çempionlar ligasynyň saýlama tapgyrynda çykyş etmek hukugyna eýe boldy. Topar finalda «Jamşedpur» klubyndan 3:0 hasabynda ynamly üstün çykdy. Mundan başga-da, geçen möwsümde topar saýlama tapgyrynyň ähli oýunlaryndan üstünlikli geçip, Omanyň «Al-Sib» toparyny ýeňdi we ýaryşyň toparçalaýyn tapgyrynda çykyş etmek tejribesini toplady.

Türkmen janköýerleri «Goa» barada nämäni bilmeli?

Ol Hindistanyň iň güýçli klublarynyň biri. 2014-nji ýylda döredilen «Goa» Hindistanyň Superligasynyň (ISL) pleý-off tapgyryna yzygiderli gatnaşýar. Şeýle-de ol Aziýanyň esasy Çempionlar ligasynyň toparçalaýyn tapgyrynda çykyş eden ilkinji hindi kluby bolup, bu waka 2021-nji ýylda bolup geçdi.

Bu kluby başgaça şypahana ştatynyň «Öküzleri» diýip atlandyrýarlar. Toparyň resmi lakamy «The Gaurs» bolup, bu at hindileriň «gäwür» diýlip atlandyrylýan ýabany öküziniň hormatyna goýlupdyr. Klub Hindistanyň futbola iň köp gyzyklanýan sebitleriniň birine wekilçilik edýär. Bu ýerde futbol kriketden has meşhurdyr.

Bu klubyň oýunçylary ispanlaryň futbol stiline ýykgyn edýärler. Klub köp ýyllaryň dowamynda Ispaniýadan gelen hünärmenlere we legionerlere daýanyp, topa gözegçilik etmäge we utgaşykly oýna aýratyn ähmiýet berýän futbol ýörelgesini saýlap aldy.

Duşuşygyň öňüsyrasynda klubda uly transfer edildi. Garşydaş toparyň düzümindäki hepdäniň esasy täzeligi 29 ýaşly ispaniýaly hüjümçi Kristian Borrego Isabeliň, futbol jemgyýetinde Çiki ady bilen tanalýan oýunçynyň, transfer edilmegi boldy. «Cartagena» we «Alcorcon» toparlarynyň düzüminde Ispaniýanyň Segunda we üçünji diwizionlarynda uly tejribe toplan hüjümçi 9-njy awgustda «Goa» bilen şertnama baglaşdy we eýýäm Arkadag şäherindäki duşuşykda ilkinji gezek meýdança çykyp biler.

Legionerleriň düzümi güýçlendirildi. Çikiden başga-da, AFK-nyň ýaryşynyň öňüsyrasynda toparyň düzümi ispaniýaly goragçy Aleks Salýa we daýanç ýarym goragçysy Aleks Walýeho bilen güýçlendirildi.

Baş tälimçiniň çalşyrylmagy. «Goa» toparynyň häzirki oýun gurluşyny döreden köp ýyllyk baş tälimçisi Manolo Markes 2026-njy ýylyň tomsunda wezipesini terk edip, «Mumbai City» toparyna ýolbaşçy boldy. Türkmenistanyň häzirki çempiony bilen duşuşyga hindi kluby täzelenen tälimçiler toparynyň ýolbaşçylygynda taýýarlandy. Bu ýagdaý garşydaşyň taktiki hereketleriniň öňünden çaklanylmagyny has-da kynlaşdyrýar.

Ýaryş barada gysgaça maglumat

AFK-2 Çempionlar ligasynyň 2026/27 ýylyň möwsümi Aziýanyň ähmiýeti boýunça ikinji klublar futbol ýaryşynyň 23-nji, «AFK-2 Çempionlar ligasy» ady bilen geçirilýän üçünji ýaryşydyr. Ýaryşy Aziýanyň futbol konfederasiýasy (AFK) guraýar. Ýaryşyň toparçalaýyn tapgyryna 32 topar gatnaşar. Ýeňiji, eger içerki çempionatdaky çykyşynyň netijesinde eýýäm saýlanmaga hukuk gazanmadyk bolsa, 2027/28 ýylyň möwsümindäki AFK-nyň Elit (Naýbaşy) Çempionlar ligasynyň deslapky tapgyrynda çykyş etmek hukugyna eýe bolar.