​«Türkmengaz» döwlet konserniniň Nebitgaz ylmy-barlag institutynyň Maglumat-seljeriş merkezi tarapyndan onlaýn okuw sapaklary geçirildi. Ol parnik gazlarynyň zyňyndylaryna gözegçilik etmek we olary tassyklamak üçin häzirki zaman usullaryna, hususan-da, hemra tehnologiýalaryna bagyşlandy.

​Ussatnews.com saýtynyň hаbar bermegine görä, Türkmenistanyň Ählumumy metan borçnamasyny amala aşyrmagyň çäginde guralan bu sapaklara «Döwletabatgazçykaryş», «Marygazçykaryş», «Lebapgazçykaryş» önümçilik müdirlikleriniň, suwuklandyrylan gaz kärhanasynyň we «Türkmengazakdyryş» birleşiginiň öňdebaryjy hünärmenleri gatnaşdylar.

​Treninge gatnaşyjylar ýurdumyzyň gaz pudagynyň desgalarynda ekologik gözegçiligiň takyklygyny ýokarlandyrmak üçin öňdebaryjy sanly gurallary ornaşdyrmak meselelerini ara alyp maslahatlaşdylar.

​Okuw maksatnamasyna ekologik gözegçiligiň esasy ylmy-tehniki taraplary girizildi:

• ​Hemra arkaly zondirleme we spektrometriýa: fiziki esaslar, gazlaryň konsentrasiýasyny kesgitlemegiň matematiki usullary we maglumatlaryň takyklygyna baha bermek usullary.

• ​Halkara standartlary: metan syzmalary barada duýdurmak we oňa garşy çäre görmek ulgamy IMEO MARS, tassyklama (validasiýa) standartlary, şeýle hem OGMP 2.0 we Ýewropa Bileleşiginiň kadalaşdyryjy binýatlary bilen tanyşmak.

• ​Amaly ekologiýa: metanyň fiziki-himiki häsiýetnamasyny seljermek, nebitgaz pudagynda syzma mehanizmleri, olary azaltmak mümkinçilikleri we 2030-njy ýyla çenli zyňyndylary azaltmak boýunça Ýol kartasy.