Türkmenistan täze gaýtadan işleýän kuwwatlyklaryň işe girizilmegi netijesinde Aziýa we Ýewropa ýurtlaryna taýýar suwuk nebit önümleriniň durnukly eksportyny ýola goýdy. Bu barada TDH-niň habar bermegine görä, Türkmenistanyň Prezidenti Serdar Berdimuhamedow Tbiliside geçirilen Türkmen-gurzin işewürlik forumynda eden çykyşynda belledi.

«Uglewodorod serişdelerini gaýtadan işleýän pudakda täze kuwwatlyklar işe girizildi. Häzirki döwürde taýýar suwuk nebit önümleri Aziýanyň we Ýewropanyň ýurtlaryna durnukly eksport edilýär» diýlip, habarda aýdylýar.

Prezident häzirki forumyň iki taraplaýyn söwda, ykdysady we maýa goýum hyzmatdaşlygyny ösdürmäge ýardam etmelidigini belledi.

Türkmenistanyň ykdysady ösüşi barada aýtmak bilen, Türkmenistanyň Prezidenti 2026-njy ýylyň başynda ýurtda Maýa goýum maksatnamasynyň tassyklandygyny we onuň esasy maksadynyň Türkmenistanyň jemi içerki önüminiň ösüş depginini 6,3% derejesinde saklamakdan ybaratdygyny ýatlatdy.

Serdar Berdimuhamedowyň sözlerine görä, ýangyç-energetika toplumyny mundan beýläk-da ösdürmek esasy ugurlaryň biri bolmagynda galýar. Hususan-da, Türkmenistan dünýäde iň iri känleriniň biri bolan «Galkynyş» gaz känini senagat taýdan özleşdirmegiň dördünji tapgyryna başlady.

Türkmenistanyň Prezidenti Hazar deňziniň uglewodorod serişdelerini özleşdirmegiň hem iň möhüm ugur bolup galýandygyny, şonun bilen baglylykda ýurduň daşary ýurtlaryň nebit-gaz kompaniýalary bilen strategik hyzmatdaşlygy yzygiderli ösdürýändigini sözüniň üstüne goşdy.

Prezident şeýle hem dünýä bazarlarynda uly isleg bildirilýän mineral dökünleri, polimerleri we beýleki himiýa önümlerini öndürýän zawodlaryň gurluşygy netijesinde, Türkmenistanyň gaz-himiýa pudagynda güýçli senagat ösüşini gazanandygyny habar berdi.