Şu gün Balkan welaýatynda Medeniýet hepdeliginiň çäreleri başlandy. Açylyş dabarasy «Türkmeniň ak öýi» binasynda geçirildi. Bu barada «Neýtralnyý Türkmenistan» elektron gazeti habar berýär.

​Açylyş dabarasynda Türkmenistanyň Prezidenti Serdar Berdimuhamedowyň iberen Gutlag haty okaldy. Onda medeniýetiň we sungatyň jemgyýetiň ruhy gymmatlyklaryny berkitmekde, şeýle-de milli mirasy halkara derejesinde wagyz etmekde uly ähmiýete eýedigi bellenildi.

​Dabaranyň çäklerinde ýurduň sungat ussatlarynyň we döredijilik toparlarynyň gatnaşmagynda baýramçylyk konserti geçirildi. «Türkmeniň ak öýi» binasynyň giň zalynda muzeý gymmatlyklaryny, şekillendiriş we amaly-haşam sungatynyň eserlerini, şeýle-de täze neşir edilen kitaplary öz içine alýan sergi gurnaldy.

​Forumyň ilkinji gününde Balkan welaýatynda kitaphana we muzeý işgärleri üçin maslahatlaryň, baýramçylyk sadakasynyň hem-de Ahal welaýatynyň, Aşgabat şäheriniň we Arkadag şäheriniň sungat ussatlarynyň konsertiniň geçirilmegi meýilleşdirildi.