Futbol boýunça Özbegistanyň milli ýygyndysy dünýä çempionatyna taýýarlyk görmegiň çäklerinde geçirilen ýoldaşlyk duşuşygynda Kanadanyň ýygyndysyndan 0:2 hasabynda ýeňildi.

Duşuşyk Kanadanyň Edmonton şäherinde geçirildi we ol meýdan eýeleriniň ýeňşi bilen tamamlandy. Ýeňiji toparyň düzüminde gollary Jonatan Osorio (58-nji minut) hem-de Jeýden Nelson (90+1-nji minut) geçirdiler.

Özbegistanyň ýygyndysy 2026-njy ýylyň dünýä çempionatynyň öňüsyrasyndaky indiki synag duşuşygyny 8-nji iýunda myhmançylykda Niderlandlaryň milli ýygyndysy bilen geçirer. Kanadanyň ýygyndysy bolsa 6-njy iýunda öz meýdanynda Irlandiýanyň milli ýygyndysyny kabul eder.

11-nji iýun — 19-njy iýul aralygynda Amerikanyň Birleşen Ştatlarynda, Meksikada we Kanadada geçiriljek dünýä çempionatynda Özbegistanyň ýygyndysy K toparçada çykyş eder. Olar toparçada Portugaliýanyň milli ýygyndysy, Kongo Demokratik Respublikasynyň milli ýygyndysy we Kolumbiýanyň milli ýygyndysy bilen güýç synanyşar.

Kanadanyň ýygyndysy bolsa B toparçada Şweýsariýanyň milli ýygyndysy, Kataryň milli ýygyndysy hem-de Bosniýa we Gersegowinanyň milli ýygyndysy bilen duşuşar.

Özbegistanyň milli ýygyndysy öz taryhynda ilkinji gezek dünýä çempionatynyň jemleýji tapgyryna çykmagy başardy.