Şu gün Türkmenistanda şanly baýram — 1941 — 1945-nji ýyllaryň Beýik Watançylyk urşunda gazanylan Ýeň­şiň 81 ýyllygy bellenilýär. Aşgabatda «Halk hakydasy» ýadygärlikler toplumyna, Arkadag şäherinde we ýurduň beýleki künjeklerinde edermen Watan goragçylaryny hatyralap dikilen ýadygärliklerine gül desseleri goýulýar. Welaýatlaryň we etraplaryň merkezlerindäki konsert meýdançalarynyň ählisinde döredijilik toparlarynyň çykyşlary ýaýbaň­landyrylýar.

Halklaryň Beýik Ýeň­şiň hatyrasyna arzuw-umytlaryny, güýç-gaýratyny we zähmetini alamatlandyrýan bu nurana baýram türkmenistanlylaryň durmuşynda-da möhüm orny eýeleýär. Türkmenistanyň Prezidentiniň nygtaýşy ýaly: «Dünýäniň gülläp ösýän döwletleriniň birine öwrülýän ýurdumyzda 1941 — 1945-nji ýyllarda watançylygyň de­ňi-taýy bolmadyk nusgasyny görkezen weteranlarymyzyň, urşuň gazaply günlerini başdan geçiren enelerimiziň, gaýduwsyzlyk bilen zähmet çeken raýatlarymyzyň sylag-hormaty örän ýokarydyr. Eziz Watanymyzy söýmegi, ynsan mertebesini belent tutmagy, ata-enä sarpa goýmagy ündeýän, hakyky watançylary terbiýelemekde görelde bolýan ýaşuly nesillerimiz biziň buýsanjymyzdyr».

Milli gahrymanlara belent sarpa goýmak we olary ýatlamak ähli döwürlerde hem türkmen jemgyýetiniň mukaddes ýörelgeleriniň biridir. Ýurtda ýowuz urşa gatnaşanlar hem-de olaryň maşgala agzalary aýratyn üns-alada bilen gurşalýar. Milli gahrymanlaryň atlary «Hatyra» we «Şöhrat» kitaplarynda ebedileşdirildi. Weteranlara durmuş ýeňillikleri bilen birlikde, maddy kömek berilýär. Şu ýyl hem döwlet Baştutany Beýik Watançylyk urşuna gatnaşanlara hem-de uruşda wepat bolan esgerleriň ýanýoldaşlaryna pul we gymmat bahaly sowgatlary gowşurmak hakynda resminama gol çekdi. 

Mahlasy, Ýe­ňiş güni mynasybetli geçirilýän dabaralar parahatçylyk dörediji döwlet bolan Garaşsyz, baky Bitarap Türkmenistana buýsanjy has-da artdyrýar.