Häzirki wagtda Türkmenistanyň Prezidentiniň degişli Kararyna laýyklykda, şu ýylyň 22 — 27-nji iýuny aralygynda nobatdaky Medeniýet hepdeligini Balkan welaýatynda geçirmek boýunça taýýarlyk işleri alnyp barylýar. Bu barada şu gün Türkmenbaşy şäherinde geçirilen Ministrler Kabinetiniň göçme mejlisinde wise-premýer B.Seýidowanyň Balkan welaýatynyň medeniýet ulgamyny kämilleşdirmek boýunça alnyp barylýan işler baradaky hasabatynda bellenildi. 

«Watan» habarlar gepleşiginde habar berlişi ýaly, Türkmenistanyň Prezidenti hasabaty diňläp, Balkan welaýatyndaky döwrebap medeniýet merkezleriniň, kitaphanalaryň, muzeýleriň we teatrlaryň işlerini talabalaýyk guramak boýunça işleri dowam etmegiň hem-de welaýatda geçiriljek Medeniýet hepdeligine-de gowy taýýarlyk görmegiň we ýokary derejede geçirmegiň möhümdigini aýtdy. Şeýle hem döwlet Baştutany wise-premýere welaýatyň çäginde ýerleşýän taryhy-medeni ýadygärlikleri aýawly saklamak we giňden öwrenmek boýunça alnyp barylýan işleri dowam etmegi tabşyrdy.