Şu gün Türkmenistanyň Prezidenti Serdar Berdimuhamedow ýurda sapar bilen gelen Gruziýanyň ykdysadyýet we durnukly ösüş ministri hanym Mariam Kwriwişwilini kabul etdi.

«Watan» habarlar gepleşiginde habar berlişi ýaly,  Gruziýanyň ykdysadyýet we durnukly ösüş ministri  türkmen topragynda mähirli kabul edilendigi üçin hoşallyk bildirip, Türkmenistan bilen ikitaraplaýyn gatnaşyklara Gruziýada ýokary baha berilýändigini belledi hem-de mümkinçilikden peýdalanyp, Gruziýanyň Prezidentiniň we Premýer-ministriniň Türkmenistanyň Prezidentine we türkmen halkynyň Milli Liderine iberen mähirli salamyny hem-de iň gowy arzuwlaryny ýetirdi.

Türkmenistanyň Prezidenti dostlukly ýurduň wekilini mähirli mübärekläp, Gruziýanyň ýolbaşçylaryna iň gowy arzuwlaryny beýan etdi hem-de myhmanyň saparynyň dowamynda Ykdysady hyzmatdaşlyk boýunça hökümetara türkmen-gruzin toparynyň nobatdaky mejlisine gatnaşjakdygyny belledi.

Duşuşygyň barşyndan bellenilişi ýaly Aşgabat şäherinde Türkmenistan bilen Gruziýanyň arasynda ýola goýulan gatnaşyklary ösdürmäge uly ähmiýet berilýär. Söwda-ykdysady hyzmatdaşlyk döwletara dialogynyň möhüm ugurlarynyň biri bolup durýar. Energetika, senagat we saglygy goraýyş ulgamlarynda hyzmatdaşlygyň oňyn netijeleri gazanyldy. Şunuň bilen birlikde, ulag-logistika ulgamy hem ikitaraplaýyn hyzmatdaşlygyň wajyp ugrudyr.

Türkmenistanyň Prezidenti söwda-ykdysady gatnaşyklary ösdürmekde Ykdysady hyzmatdaşlyk boýunça türkmen-gruzin hökümetara toparynyň ornuny aýratyn belläp, toparyň nobatdaky mejlisiniň bilelikdäki tagallalary birleşdirmäge ýardam berjekdigine ynam bildirdi. Şeýle hem söhbetdeşler medeni-ynsanperwer ulgamdaky hyzmatdaşlygyň döwletara gatnaşyklaryny pugtalandyrmakda halklary ýakynlaşdyrmakda hem-de medeniýetleri özara baýlaşdyrmakda uly ornuny bellediler.