«Turkish Airlines» awiakompaniýasynyň halkara gatnawlary bilen uçýan ýolagçylar öz elektron enjamlaryny we goşlaryny öňünden barlamaly bolar. Awiakompaniýa adaty pauerbanklardan başlap, «akylly» çemodanlara çenli litiý akkumulýatorlary bilen işleýän enjamlary gatnatmak boýunça hereket edýän çäklendirmeleri ýatlatdy.

Esasy üýtgeşme howpsuzlyk bilen baglanyşykly: litiý batareýaly ähli enjamlar indi has berk gözegçilikde saklanar.

Pauerbanklar: diňe salonda we çäklendirmeler bilen

Diňe aşakdaky talaplara laýyk gelýän pauerbanklary geçirmäge rugsat berilýär:

• düzümindäki metal litiý 2 gramdan köp bolmaly däl;

• ýa-da litiý-ion akkumulýatorlarynyň kuwwaty 100 Wt/sag-dan ýokary bolmaly däl.

Şunda anyk düzgünler kesgitlenilýär:

• bir ýolagçy üçin 2 enjamdan köp bolmaly däl;

• diňe uçaryň salonynda saklamaly;

• her bir pauerbank gysga utgaşmalardan goralan bolmaly;

• olary goş goýulýan ýokarky tekjelerde däl-de, oturgyjyň aşagynda ýa-da öňdäki jübüde saklamaly;

• uçuş wagtynda olary ulanmak ýa-da zarýad bermek gadagandyr.

Simsiz modeller boýunça aýratyn talap: olar doly öçürilen bolmaly we tötänleýin zarýad alyp başlamazlygy üçin başga enjamlar bilen galtaşykda durmaly däl. 

Kuwwaty 100 Wt/sag-dan ýokary ýa-da litiý mukdary 2 gramdan köp bolan pauerbanklary gatnatmak gadagandyr.

«Akylly» çemodanlar: nämelere üns bermeli?

Awiakompaniýa şeýle çemodanlary iki görnüşe bölýär:

Aýrylmaýan batareýaly çemodanlar:

• metal litiý 0,3 gramdan köp bolmaly däl;

• kuwwaty 2,7 Wt/sag-dan ýokary bolmaly däl;

• bu görkezijilerden ýokary bolan ýagdaýynda — gatnatmak gadagan.

Aýrylýan batareýaly çemodanlar:

• 2 grama çenli litiý ýa-da 100 Wt/sag-a çenli kuwwat;

• bir ýolagçy üçin 15 sany ätiýaçlyk akkumulýatora çenli rugsat berilýär (aýratyn ýagdaýlarda has köp mukdar ylalaşylyp bilner);

• kuwwaty 100-den 160 Wt/sag-a çenli bolan iň köp 2 sany akkumulýatora rugsat berilýär.

Eger çemodan goş bölümine tabşyrylsa, akkumulýatory hökman aýyrmaly. Aýrylan batareýalar diňe salonda gatnadylmalydyr. Çemodanyň özi ölçegleri laýyk gelse el goşy hökmünde alnyp bilner ýa-da aýratynlykda goş bölümine tabşyrylyp bilner.

Bu ýolagçylar üçin näme aňladýar?

Düzgünler has anyklaşdy we indi olary syýahata çykmazdan öň barlamak has aňsat. Gysgaça aýdylanda: az kuwwat, az enjam we olary nirede, nähili gatnadýandygyňyza has uly üns.

Iň gowy çözgüt — tehnikalaryňyzy öňünden jemläp, ähli zadyň talaplara laýykdygyna göz ýetirmekdir. Bu aeroportda wagtyňyzy tygşytlar we uçuşyň öňüsyrasy garaşylmadyk kynçylyklardan gorar.