Pakistanyň Türkmenistandaky ilçisi Farýal Legari Türkmenistanyň Bedenterbiýe we sport baradaky döwlet komitetiniň başlygy Allaberdi Saparow bilen duşuşyk geçirdi. Bu barada Pakistanyň Aşgabatdaky ilçihanasynyň metbugat gullugy habar berdi.

Duşuşygyň dowamynda diplomat iki ýurduň arasynda sport ulgamynda amaly hyzmatdaşlygy pugtalandyrmagyň möhümdigini nygtady.

Legari Türkmenistanyň we Pakistanyň sport toparlarynyň bilelikdäki we alyş-çalyş saparlaryny guramagy, dostlukly duşuşyklary geçirmegi, şeýle hem futbol, hokkeý, woleýbol, söweş sungatlary, ýüzmek we gimnastika ugurlarynda özara türgenleşik mümkinçiliklerini döretmegi teklip etdi.

Ilçi türkmen tarapyny Pakistanda her ýylyň iýul aýynyň ilkinji hepdesinde 3700–3800 metr belentlikdäki Şandur platosynda geçirilýän polo festiwalyna çagyrdy. Bu çäre dünýäde iň beýik ýerde ýerleşýän polo meýdançalarynyň biri hökmünde tanalýar.

Diplomat Pakistan bilen Türkmenistanyň atlara bolan söýgüsiniň ikitaraplaýyn atçylyk sport çykyşlaryny, bilim we tejribe alyş-çalşygyny ösdürmek arkaly has-da berkitmek mümkinçiliginiň bardygyny belledi. Şeýle-de ol tentpegging (at üstündäki sport görnüşi), polo, at tanslary boýunça çykyşlary guramak hem-de at çapyşyklaryna gatnaşmak ýaly ugurlary mysal getirdi.