Aşgabatda Ýewropa güni mynasybetli «Ganatly dostluk» atly ÝB–Türkmenistan köpçülikleýin ýörite ylgaw ýaryşy geçirildi. Çärä dürli ýaşdaky – çagalardan başlap ýaşululara çenli 800-den gowrak adam gatnaşdy. Olaryň arasynda ussat türgenler, höwesjeňler hem-de mümkinçilikleri çäkli adamlar hem boldy. Ähli aralyklaryň ugurlary Garaşsyzlyk seýilgähiniň töwereginden geçdi. Gatnaşyjylara 2, 5 we 10 km aralyklar hödürlendi. Ýeňijiler hem-de işjeň gatnaşyjylar baýraklar we ýadygärlik sowgatlary bilen sylaglandy.

«Bu ylgaw, aslynda maý aýynda bellenilýän Ýewropa güniniň umumy maksatnamasynyň bir bölegi bolup durýar. Emma howa şertleri sebäpli biz çärelere eýýäm häzirden başlaýarys» — diýip, Beata Peksa žurnalistlere gürrüň berdi.

Ol bu çäräniň Bütindünýä saglyk güni bilen hem baglanyşyklydygyny nygtap, onuň dürli yklymlardan gelen adamlary, şol sanda köp sanly diplomatlary we Türkmenistanyň dürli sebitleriniň ýaşaýjylaryny birleşdirendigini belledi.

Ýewropa güni her ýylyň 9-njy maýynda häzirki Ýewropa Bileleşiginiň esasyny goýan 1950-nji ýyldaky Şuman jarnamasynyň hormatyna bellenilýär. Geçen ýyl ÝB-niň wekiliýeti Türkmenistanyň Bedenterbiýe we sport baradaky döwlet komiteti hem-de Aşgabat şäher häkimligi bilen bilelikde Parahatçylyk we ynanyşmak marafonyny gurapdy.

Ylgawa gatnaşan Aşgabat şäheriniň ýaşaýjysy, 10 km aralygy geçen şowhunly çykyşlary we çäreleri alyp baryjy Myrat Şyhyýew öz täsirleri bilen paýlaşdy.

«Guramaçylara ajaýyp çäre üçin minnetdarlyk bildirýärin. Şeýle ylgawlar jemgyýetimiz üçin örän möhümdir – olar adamlary birleşdirýär, sagdyn durmuş ýörelgesini alyp barmaga höwes döredýär we sportuň her bir adam üçin elýeterlidigini görkezýär. Bu ýeriniň gurşawy diýseň täsirli boldy, goldaw we dostluk duýuldy. Dürli ýaşdaky we mümkinçilikdäki adamlaryň gatnaşmaga çagyrylmagy aýratyn möhüm. Şeýle başlangyçlaryň yzygiderli geçiriljekdigine umyt edýärin, sebäbi sagdyn durmuş ýörelgesi biziň her birimiz üçin dogry saýlawdyr».