Türkmenistanyň ýaşlar wekiliýeti Merkezi Aziýa ýurtlarynyň wekiliýetiniň düzüminde 2026-njy ýylyň 24-nji martyndan 2-nji apreline çenli Hindistanda tanyşdyryş maksatnamasyna gatnaşýar. Saparyň dowamynda üç şähere — Mumbaýa, Goa we Nýu-Delä baryp görmek, hökümet wekilleri bilen duşuşmak hem-de ýurduň öňdebaryjy ylmy we medeni edaralaryna aýlanmak göz öňünde tutulýar.

Mumbaýda maksatnamanyň gatnaşyjylary Bombeý gazna biržasynyň işi bilen tanyşdylar we dünýäniň öňdebaryjy inženerçilik okuw mekdepleriniň biri bolan Hindistanyň Tehnologiýa institutyna (IIT Bombay) baryp gördüler. Mumbaý maksatnamasynyň medeni böleginde Elefant gowaklaryna, Hindistanyň derwezesine, Çhatrapati Şiwaji Maharadja muzeýine we Dadasaheb Phalke Çitranagari kinostudiýasyna gezelenç edildi. Şeýle hem Maharaştra ştatynyň gubernatory bilen duşuşyk geçirildi.

Şu gün, 28-nji martda wekiliýet Goa ştatynda bolýar. Günüň dowamyndaky maksatnama Sinkherimdäki XVII asyra degişli bolan we Arap deňzine seredip duran portugal galasy — Aguada fortuna baryp görmegi, şeýle hem Kalangut ýa-da Baga kenarýakalarynda dynç almagy öz içine alýar. Düýn bolsa ýaşlar ÝUNESKO-nyň Bütindünýä mirasynyň sanawyna girýän Bom-Žezus bazilikasyna we Se ybadathanasyna baryp gördüler.

Öňümizdäki günlerde Dona-Pauladaky Milli okeanografiýa institutyna baryp görmek meýilleşdirilýär. Ol ýerde wekiliýet Hindistanyň deňiz barlaglary we «mawy ykdysadyýet» ugrundaky başlangyçlary bilen tanyşdyrylar. Şeýle hem Goa ştatynyň gubernatory bilen duşuşyk bolar.

Maksatnamanyň jemleýji bölegi Nýu-Delide geçiriler. Ol ýerde Hindistanyň ýaşlar işleri we sport ministri hem-de daşary işler ministri bilen duşuşyklar, «Mera Yuva Bharat» ýaşlar maksatnamasynyň gatnaşyjylary bilen özara pikir alyşmalar we ÝUNESKO-nyň Bütindünýä mirasyna girýän Humaýunuň aramgähi bilen tanyşlyk bolar.

Bu maksatnama Hindistan bilen Merkezi Aziýa ýurtlarynyň arasyndaky ýaşlar diplomatiýa alyş-çalşygynyň çäginde amala aşyrylýar we tehnologiýa, ylym, medeniýet hem-de telekeçilik ulgamlarynda ynsanperwer gatnaşyklary berkitmäge gönükdirilendir.