Türkmenistanyň daşary işler ministri Raşid Meredow Hytaý Halk Respublikasynyň Türkmenistandaky Adatdan daşary we Doly ygtyýarly ilçisi Szi Şumin bilen duşuşdy.

Daşary işler ministrliginiň resmi saýtynda berilýän habara görä, taraplar iki ýurduň arasyndaky hyzmatdaşlygy has-da ösdürmek bilen bagly meseleleriň giň toplumyny ara alyp maslahatlaşdylar.

Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagyň golaýda Hytaý Halk Respublikasyna amala aşyran dostlukly saparyna aýratyn ähmiýet berildi. Şol saparyň çäklerinde HHR-nyň Başlygy Si Szinpin bilen netijeli we dostlukly duşuşygyň geçirilendigi nygtaldy.

Duşuşygyň dowamynda diplomatlar agzalan saparyň dowamynda gazanylan ylalaşyklary iş ýüzünde durmuşa geçirmek barada pikir alyşdylar.