Türkmenistanyň Prezidenti «Türkmennebit» döwlet konserniniň maddy-tehniki binýadyny berkitmäge gönükdirilen Karara gol çekdi. TDH agentliginiň habar bermegine görä, bu resminama ýurduň nebitgaz pudagynyň öňünde goýlan wezipeleri üstünlikli çözmek maksady bilen kabul edildi.

​Ministrler Kabinetiniň mejlisinde bu baradaky degişli hasabat bilen wise-premýer G.Agajanow çykyş etdi. Wise-premýer konserni döwrebaplaşdyrmak boýunça amala aşyrylýan çäreler barada habar berdi we döwlet Baştutanynyň garamagyna Kararyň taslamasyny hödürledi.

​Kabul edilen çäreler iri nebit we gaz ýataklarynyň bökdençsiz hem-de netijeli ulanylmagyny üpjün etmäge, şeýle hem gözleg-buraw işlerini geçirmäge we täze meýdançalary özleşdirmäge gönükdirilendir.

​Türkmenistanyň Prezidenti hasabaty diňläp, ýurtda nebitgaz ýataklaryny özleşdirmek we buraw işlerini ýokary hilli ýerine ýetirmek boýunça alnyp barylýan işleriň ulgamlaýyn häsiýete eýedigini belledi. Döwlet Baştutany Karara gol çekip, wise-premýere birnäçe anyk tabşyryklary berdi.

​Resminama laýyklykda, «Türkmennebit» döwlet konsernine önümçilik kuwwatlyklaryny has-da artdyrmak boýunça zerur işleri geçirmek tabşyryldy.