Türkmenistanly mugallymlar Russiýa Federasiýasynyň Maksatlaýyn gaznasynyň maliýe goldawynda «Klimat gutujygy» sebit başlangyjynyň çäklerinde BMG-niň Ösüş Maksatnamasynyň (BMGÖM) Stambuldaky sebit haby (IRH) tarapyndan guralan, klimatyň üýtgemegi mowzugy boýunça usulyýet materiallaryny taýýarlamak ugrunda mugallymlaryň arasyndaky III Halkara bäsleşikde görkezen ýokary netijeleri üçin baýraklara mynasyp boldular.

BMGÖM-niň Türkmenistandaky Hemişelik wekili Narine Saakýan, klimat bilimini ösdürmäge goşan gymmatly goşantlaryny ykrar etmegiň nyşany hökmünde, BMGÖM-niň adyndan ýeňijilere sertifikatlary we ýadygärlik sowgatlaryny gowşurdy.

BMGÖM-niň durmuş ulgamlaryndaky sahypalarynda habar berlişi ýaly, baýrakly orunlara Türkmenabat şäherindäki 11-nji mekdebiň (1-nji orun), Aşgabat şäherindäki 55-nji mekdebiň (2-nji orun) we Farap şäherindäki 2-nji mekdebiň (3-nji orun) mugallymlary mynasyp boldular.

Eminler tarapyndan bellenilip geçilen usulyýet işleri klimatyň üýtgemegi mowzugyny bilim beriş arasyna utgaşdyrmagyň innowasion çemeleşmelerini görkezýär hem-de çagalary we ýaşlary durnukly geljegiň bähbidine oýlanyşykly hereket etmäge ruhlandyrmaga ýardam edýär.

«Klimat gutujygy» — bu mugallymlara klimatyň üýtgemegi mowzugyny gyzykly we düşnükli görnüşde okatmaga kömek edýän halkara interaktiw okuw gollanmalarynyň toplumydyr. Türkmenistanda bu toplum türkmen we rus dillerine uýgunlaşdyryldy, ähli zerur bolan milli ylalaşyklar alyndy we bilim beriş işine girizilmäge taýýar edildi.